Nujoma a tyapula egwanitho lyoomvula 90 pEtunda

Nujoma a tyapula egwanitho lyoomvula 90 pEtunda Omukokoli presidende Sam Nujoma okwa holola kutya ina hala okuninga oshituthi shetyapulo lyoomvula dhe 90 oshinene omolwa onkalo yoshikukuta ndjoka ya taalela oshilongo.

Ihe nonando ongaaka Sam Nujoma Foundation, Swapo naanangeshefa oya unganeke oshituthi oshinene shevalo lyaNujoma shoka sha ningilwa momukunda moka a valelwa mEtunda popepi nOkahao mOlyomakaya ga piti.

Oshituthi shoka osha kaliwa kAaNamibia ya za koombinga noombinga dhoshilongo. Osha kaliwa woo kaanambelewa aakuluntu mepangelo, Omutse gwoshilongo, Hage Geingob oshowo omupresidende nale Hifikepunye Pohamba.

Nujoma okwa popi kutya ehangano lyoSam Nujoma Foundation oshowo amushanga gwongundu yoSwapo oya longo nuudhiginini melongekidho lyoshituthi shoka. “Ondi shi shi kutya oomvula o 90 dhonkalamwenyo yomuntu oshinima oshinene na osha pumbwa okuhambelelwa ihe omolwa onkalo yoshikukuta ndjoka ya taalela oshilongo omolwa omalunduluko gonkalo yombepo moshilongo, kanda li ndi na ohokwe okuninga oshituthi oshinene nuumvo mokutyapula oomvula dhandje 90, onda li owala nda hala okuninga oshituthuthi oshishona,” Nujoma a popi.

“Pethimbo ndika pitikenindje ndi pandule epangelo kohi yelelo lyOmupresidende Geingob sho a tokola nokuninga etseyitho kutya oshikukuta osha ninga onkalo yopaulumomhumbwe moshigwana omolwa ondjala ndjoka tayi dhenge omahala ga yooloka moshilongo omolwa omuloka gwankundipala ngoka gwa monika nuumvo moshilongo.”

Pohamba, ngoka a gandja kuNujoma omagano golwoondje okwa popi kutya onkalamwenyo ye oya pumbwa okuhambelelwa molwaashoka okwa enditha oshigwana mondjila onde okuya kemanguluko.

Nujoma okwa li a wayiminwa komukulukadhi gweKovambo, oyana oshowo aakwanezimo lye pethimbo lyoshituthi shoka.

Geingob okwa popi kutya oshilongo otashi tyapula oomvula 90 dhevalo lyependafule.

Okwa popi kutya kohi yelelo lyaNujoma Swapo okwa tamekitha ekondjelomanguluko lyoshilongo, papolotika, paundiplomate oshowo paukwiita. Okwa tsikile kutya ekondjo ndyoka olya li ele nelulu ihe Swapo okwa sindana molwaashoka okwa li e na omukumo mokuhingila AaNamibia kemanguluko.

Geingob okwa popi kutya pethimbo ndika sho ta ku tyapulwa evalo lyomukokoli, otaya pandula onkalamwenyo ye ndjoka a tula mekondjelomanguluko lyoshilongo.

Geingob okwa popi kutya ota dhimbuluka olweendo lwe okuya koCuito Cuanavale nuumvo momwedhi Maliitsa konima owala yomasiku gaali sho Namibia a tyapula oomvula 29 dhemanguluko.

“Medhimbuluko lyEsiku lyoSouthern African Liberation otwa talelepo iihongwathano itatu mbyoka yi li molupe lyomapenda gaakwiita mevi lyaAfrika.”

“Onda popi kombinga yependa lyetu ndyoka elelo lyawo ewananawa lyetu enditha mondjila yemanguluko lyaNamibia, netsomukumo lye olya hwahwameke AaNamibia omayovi opo ya wayimine ekondjelomanguluko. Ombepo yuupendafule mboka otayi tsikile nokutsa omukumo omapupi nomapupi gaNamibia,” Geingob a popi.

ILENI NANDJATO