Ne kamu shi aanafaalama, ihe aaniimuna – Shoombe

Ne kamu shi aanafaalama, ihe aaniimuna – ShoombeEvi li gandjeni po ngele itamu vulu uunafaalama Omundokotola Omukuluntu gwIimuna moshitopolwa shonooli uuzilo, Kennedy Shoombe okwa lombwele aanafaalama yomomudhingoloko gwaMangetti kutya naya hulithepo okwiiyithana aanafaalama nopehala naya iyithane kutya aaniimuna yoohango nomafumbiko. Pahapu dhomundohotola Shoombe, momudhingoloko ngoka omu na oongombe dha thika po 200 000 ndhoka itadhi longithwa paliko.

Okwa popi kutya aanafaalama moMangetti nayo otaya pelwa uusama omolwa onkalo yopaliko ndjoka ya nkundipala moshilongo molwaashoka oya kalelwa oongombe omayovi nomayovi moofaalama dhawo na itaya yambidhidha sha koGross domestic product (GDP).

Shoombe okwa popi ngaka mOlyomakaya, pethimbo kwa gandjwa endiki lyuuniimuna okuza kUuministeli wuunamapya aanafaalama yoMangetti Farmers Association (MFA) pOkapya Livestock Development Centre (LDC)

Ehangano ndyoka olya li lya shangele omukanda uuministeli opo li vule okulongitha ehala ndyoka tali adhika mOkapya, pethimbo lyomalanditho giimuna.

Konyala aanafaalama ya thika pe 100 oya gongala pOkapya opo ya taambeko ehala ndyoka okuza kuuministeli. Omusilishisho gwehala ndyoka, Tuhafeni Sheuyange, okwa lombwele aanafaalama kutya epangelo olya gandja ezimino opo aanafaalama ya longithe endiki ndyoka.

Sheuyange okwa popi kutya eindilo ndyoka olya ziminwa pakathimbo opo aanafaalama ya longithe ehala ndyoka momasiku ga 6 gaApilili sho taku ningwa omalanditho giimuna, nokuza pesiku ndyoka, epangelo otali ka tokola kombinga yeindilo ndyoka.

“Onkene owa pumbwa okukwashilipaleka epangelo kutya omwiitulamo na otamu vulu okukalekapo endiki. Omwa holola meindilo lyeni kutya elalakano lyomalanditho okushunitha pevi omwaali gwiimuna unene pethimbo ndika lyoshikukuta.”

Shoombe okwa popi kutya nomwaalu omunene gwoongombe ngoka gu li omudhingoloko gwaMangetti aanafaalama momudhingoloko ngoka kaya li ya pumbwa okukuga kepangelo opo ya kwathelwe hie oyo ya li ya pumbwa okukwathela epangelo pethimbo lyonkalo yeliko ya nayipala ndjoka ya taalela oshilongo.

“Otandi tala aaniimaliwa sho nde mutala ihe moshili ooshoka kutya ne amuhe aathigona. Omu na iimuna oyindji ihe kamu iiyemo okuzilila moofaalama dheni, ihe ohamu longitha moofaalama dheni iimaliwa okuza moondjato dheni. Otwa pumbwa okuningeni omalunduluko opo iimaliwa mbyoka yi li moofaalama dheni yi ye moondjato dheni. Omwa pumbwa okuhulitha po omudhigululwakalo guunafaalama woohango omafumbiko,” Shoombe a popi.

Omunashipundi gwoMFA, Ismael Shailemo okwa popi kutya ehangano ndyoka oli na iilyo ya thika po 200. Okwa popi kutya omudhingoloko gaMangetti ogu na oofaalama dhi li 96 ndhoka dha gandjwa kepangelo moomvula dho 1980, omanga ne dhi li momake guuministeli wuunamapya mOkapya Livestock Development Centre (LDC).

Ope na woo oofaalama ndhoka dha li dha gandjwa kelelo lyaNdonga.

Sha landula omutumba gwevi omutiyali, uuministeli womavi owa tameme okugandja omikanda dhokuhiila evi kaanafaalama momudhingoloko ngoka.

Shoombe okwa popi kutya ehala ndyoka olyomatulululo owala ngaashi oofaalama adhihe dhomatululul omoshilongo noonakukalamo inaya kala taya futu iifuta ya sha muule woomvula 40 dha piti, ihe natango onkene taya pula epangelo li ya yambidhidhe. Shoombe okwa lombwele aanafaalama mboka kutya ngele itaya vulu uunafaalama naya gandje evi kwaamboka yahala uunafaalama.

Okwa popi kutya oye na evi lya gwana noomboola, na omolwashike ihaya ningi iikunino. Okwa tsikile kutya aanafaalama mboka itaya vulu owala okukala ya tala miimuna ihe otaya vulu woo okuningwa iinima yilwe moofaalama dhawo.

Okomitiye yiilyo 12 oya hogololwa opo yi kwatele komeho omalanditho ngoka taga ka ningwa. Okomitiye otayi kwatelwa komeho komunashipundi Veiko Namwoonde oshowo amushanga Sunday Shalli. Iilyo yilwe oJulius Ambondo, Silvanus Haufiku, Paulus Shilongo, Daniel Ngesheya, Padelia Nghishongwa, John Shilongo, Veiko Andjamba, Kamukwatange, Itoolwa Josef oshowo Kennedy Iyambo.

Aanafaalama otaya hiwa ya fale iimuna yawo kOkapya komalanditho ngoka taga ka kalako, ihe naya kale ye na oombaapila dhomondjila.

ILENI NANDJATO