Opoloyeka yomeya mOmuntele oya pumbwa omulongi omupe

Opoloyeka yomeya mOmuntele oya pumbwa omulongi omupe Oshimaliwa shopoloyeka yomunino gwomeya Ondangwa-Omuntele osha li poomiliyona 46.4 momvula yo 2014 ihe osha yi pombanda poomiliyona 51.1 momvula yo 2017.

MuMaalitsa gwo 2017 ehangano ndyoka lya li tali longo omunino ngoka olya hulitha po iilonga kwa maniwa owala iilonga noopresenda 89. Uuministeli womeya owa kutha oonkondo okondalaka ndjoka na otawu pangele ngashiingeyi okugandja po iilonga mbyoka, tayi tameke moshikakomvula sho2019/2020.

Payamukulo ndyoka lya gandjwa komukomeho moshikondo shuunamapya, omeya niihwa, Percy Misika, sho a ningilwa omapulo koNamibian Sun.

Misika okwa popi kutya opoloyeka yomunino gwomeya Ondangwa – Omuntele oguule woshinano shookilometa 50 muuzilo okuuka kOnadhi oshowo muuninginino okuuka kOnanke. Omunino ngoka okwa tegelelwa gu ka gandje omeya kaanamagumbo 928 mwakwatelwa aantu 6 932 iimuna iinene yi li po 33 790 oshowo iimina mbyoka iishona yi li 18395. “Oshimaliwa shoka sha li sha pumbiwa mopoloyeka ndjoka momvula yo 2014 osha li pooN$46 374 883, ihe momvula yo 2017 omwaalu ngoka ogwa londo pombanda sigo opoN$51 116 368. Okondalaka yiilonga oya li ya ningwa yuule woomwedhi hamano kwiikwatelelwa komaupyakadhi gamwe po ga dhidhilikwa kunakulonga opoloyea ndjoka oshowo uuministeli. Omulongi gwopoloyeka ndjoka okwa hulitha po okondalaka omolwa uupyakadhi wopashimaliwa wa etithwa kiifuta hayi gandjwa kwa lata.”

Kansela gwoshikandjohogololo Omuntele, Sacky Nangula, okwa popi kutya opoloyeka ndjoka oya li ya nuninwa Omuntele nOnadhi ihe oya lelepekwa noshinano shookilometa 20 okuya mOkuma niimaliwa oya pupo.

Misika okwa popi kutya opoloyeka ndjoka oya nuninwa onga oskema yokuya moshipala enota pethimbo lyoshikukua omolwa ongushu yopevi yomeya gomevi momudhingoloko ngoka ge na oshimongwa. Okwa popi kutya okwa dhidhilikwa kutya omahala ogendji monooli yaNamibia oge na omeya gomevi gongushu yanayipala nepangelo pamwe nomalelo gomondjila oya ningi etokolo opo ku gandjwe omeya ga yela kaakalimo oshowo kiimuna miitopolwa mbyoka.

ILENI NANDJATO