Omagumbo 284 ga gandjwa mEenhana

Omagumbo 284 ga gandjwa mEenhana

Ehangano lyoNational Housing Enterprise (NHE) olya gandja koshigwana omagumbo ga thika po-284 mondoolopa yEenhana.
Omagumbo ngoka oga tungwa muule woomvula mbali kongushu yoshimaliwa shoomiliyona 112, mwakwatelwa oomiliyona 24 dhokuwapaleka evi.
Omunashipundi gwoNHE, Sam Shivute okwa popi kutya ngele oya kala nokutsikila okumona eyambidhidho okuza kepangelo nena otaya kala nokugwanitha po iilonga yawo.
“Namibia onkene e na ompumbwe yomagumbo gombiliha ihe uuna epangelo tali tsikile nokutuyambidhidha nena otwa pyakudhukwa okulonga iilonga yetu, nokugwanitha po iinakugwanithwa mbyoka twiinekelelwa.”
Shivute okwa pula aantu yopaumwene ya hulithe po omukalo gwokutunga omagumbo nokuga landitha po kondilo. Okwa popi kutya oondando dhomagumbo gawo nadhi kale tadhi vulu okwiidhidhimikilwa opo aaantu ayehe ya vule okulikola omagumbo.
Minista Sophia Shaningwa, okwa popi kutya epangelo onkene lyiitula mo nokukandula po ompumbwe yomagumbo mokati koshigwana.
Minista Shaningwa okwa tsu omuthindo opo aatungi ya tunge omagumbo gongushu, na okwa gwedha po kutya epangelo itali kiidhidhimikila aatungi mboka taya tungu omagumbo gomuthika gwopevi noka ge na ongushu.
Shaningwa okwa pula woo ooyene yomagumbo ngoka, ye ga kwate nawa nokufuta pathimbo iifuta yawo.


KENYA KAMBOWE