Valombola a holoka mompangu

Valombola a holoka mompangu Oshipotha shedhipago shoka tashi tamanekelwa kOmufala gwOontauki mUuministeli wIikwameni nOmatembu, Likius Valombola (53), ngoka e li pondje yodholongo koshimaliwa shomboloha yooN$15 000, omolwa edhipago lyaHelao Ndjaba, osha undulilwa komeho mEtine lyoshiwike sha piti, omolwa epeko lye ndoka lya li kali po.

Aanambelewa yompangu oya koleke mOmaandaha kutya nonando oombaapila dhompangu otadhi ulike kutya oshipotha shoka otashi shuna mompangu momasiku ga 8 epeko lyomutamanekwa olya shangwa omasiku 18 ngoka ge li Osoondaha.

Momaandaha, oshipotha shoka osha tameke ngaashi sha li sha pangelwa nepeko olya li mompangu.

Mangestrata Atutala Shikalep okwa undulile oshipotha shoka komasiku 21 gaJanuari omvula twa taalela opo ku ningwe omakonaakono ihe aayambidhidhi nofamili oya holola kutya ekateko lyoshiwike sha piti otali limbilike.

Omumwayinamati omushona gwaNdjaba, Lamek Ndjaba okwa popi kutya: “Sho twa yi kompangu mEtine lya piti otwa lombwelwa kutya epeko kali po, otwa yi kopolisi tu ka pule kutya omolwashike na otwa lombwelwa komukonaakoni moshipotha shoka Detective Sergeant Moses Shivolo, kutya epeko inali vula okuya kompangu molwaashoka omasiku oga ngoka ga shangwako ga puka, sho ga shangwa 18 gaNovemba.” Esiku ndyoka Osoondaha, Ndjaba a popi.

“Otwe mu lombwele kutya ye onga omunambelewa omukonaakoni okwa li a pumbwa okukala eshi shi, na okwe tu uvaneke kutya ota kwashilipaleke kutya epeko ndyoka olya holoka mompangu mOmaandaha.”

Aayambidhidhi mboka taya uilke uukwawo wanankali omolwa edhipago lyomunyasha ngoka na oya hala uuyuuki moshipotha shoka, oya holoka mompangu, mwa kwatelwa ofamili, yina, aamwayina, kuume ke oshowo iilyo yoNamibia National Students Organisation (Nanso).

Yamwe oya zala uumbindja wa shangwa #JusticeForHelao oshowo #BreakFreeFromViolence.

Kuume keJason Shivute, okwa popi kutya epeko ndyoka lya kana olya tsu omukumo aayambidhidhi opo ya kwashilipaleke kutya oshipotha shoka osha kala mompangu na itashi kana nenge shi katekwe komaupyakadhi.

Ndjaba okwa hulitha muMei gwonuumvo, konima yomasiku omugoyi sho a yahwa momutse.

Valombola okwa popi mompangu kutya ka li e na elalakano lyokuyaha Ndjaba ihe okwa umbu iikuti mombanda onga ekunkililo omolwashoka okwa li e wete egameno lye li li moshiponga.

Oshiningwanima shoka osha ningwa ongulohi yEtitano.

Valombola okwa kalelwapo kuNdeli Ndeitwah, omanga epangelo tali kalelwa po kuPieter Smit.

JANA-MARI SMITH