Inaku monika natango mpoka pwa tulwa omutse gwaMandume

Inaku monika natango mpoka pwa tulwa omutse gwaMandume Natango elelo lyUukwanyama kali na ontseyo kutya openi pwa tulwa omutse gwomukwaniilwa gwawo, Mandume yaNdemufayo sha landula sho a dhipagwa momvula yo 1917.

Pethimbo kwa li kwa ningwa edhimbuluko lyoomvula 100 omukwaniilwa ngoka a hulitha muFebruali gwonuumvo, Omukwaniiwa gUukwanyama, Martha Mwadinombo Kristian Nelumbu okwa pula opo omutse gwaMandume gu shunithwe.

Nelumbu okwa pula mboka ye shi kutya omutse gwaMandume ogu li pevi, opo ya kwathele elelo ndyoka, go gu shunithwe.

Omunashipundi gwelelo ndyoka, George Nelulu okwa lombwele oshifokundnaeki shoNamibian Sun oshiwike shika kutya, okwa totwa okomitiye ndjoka tayi ya mbidhidha mokumona kutya omutse gwomukwaniilwa gwawo nale, ogu li peni.

Nonando ongaaka, inaya vula okumona kutya omutse ngoka ogu li peni, naamboka taya pewa uusama omolwa eso lye oya tindi kutya kaye na omutse ngoka.

Nelulu okwa popi kutya konima yeindilo lya ningwa kOmukwaniilwa, okwa ulikwa okomitiye yi ye molukongo pamwe naakalelipo yaPortugal oshowo Britain, ihe oya lopota kutya iilongo mbyoka iyali oya tindi kutya kayi na omutse gwaMandume.

“Natango otatu ningi eindilo kutya kehe ngoka e na uuyelele kutya openi pe na omutse gwOmukwaniilwa Mandume opo e ye polweela.”

Omugandjimayele komukwaniilwa gwUukwanyama, Hadino Hishongwa, okwa lombwele oNamibian Sun omvula ya piti kutya oye na omukumo kutya omalelo gaSouth Afrika oge na ontseyo kutya openi pe na omutse gwomukwaniilwa gawo.

Okwa popi kutya opena omathano gathanekwa gookomanda dhi na omutse gwaMandume, naashoka osho sha etitha ya pule omalelo gaSouth Afrika, ge ya yambidhidhe.

Omaiyuvo gaHishongwa inaga yooloka kwaangoka gaanongononi mboka ya popi kutya aakwiita yaSouth Afrika mboka ya ponokele Mandume pamwe naalumentu ye mOihole moAngola momasiku ga 6 gaFebruali mo-1917, konima oya teteko omutse gwe nokugweenditha mombala ye. Olutu we kalu na mutse olwa fumbikwa mOihole.

Omathano gaakwiita yaSouth Afrika ya humbata omutse gwaMandume ogeeta omaiyuvo kutya omalelo gaSouth Afrika oge shi mpoka pe na omutse gwomukwaniilwa ngoka. Yamwe oyiitala kutya omutse gwaMandume ogwa fumbikwa moPalm Tree Memorial Park popepi nosasiyona yomashina gokolutenda mOvenduka mpoka pwa fumbikwa woo aakwiita 12 mboka ya hulithile molugodhi ndoka omanga yamwe ya popi kutya omutse gwaMandume ogwa falwa koGermany.

Omupresidende nale Hifikepunye Pohamba, naye okwali a pula egalulo lyomutse gwaMandume oomvula dha piti.

caption

ILENI NANDJATO