Ondangwa ya popile egandjo lyooplota kumayola

Ondangwa ya popile egandjo lyooplota kumayola Elelo lyondoolopa yaNdangwa olya popile etokolo lyawo lyokugandja ooplota ndatu dhongeshefa kehangano lyoHuhu City, ehangano lya mayola gwondoolopa ndjoka, Paavo Amwele, taya popi kutya okwa ningi eindilo lyooplota ndhoka omanga ina ninga mayola gwondoolopa.

Etseyitho ndyoka lya tulwa miikundaneki oshiwike sha piti, olya tseyitha kutya elelo otali gandja ooplota ndatu dhongeshefa kuAmwele, mExtension 23 kondando yoo N$229 856.

Omupopiliko gwelelo ndyoka, Petrina Shitalangaho okwa lombwele oNamibian Sun kutya kape na sha sha puka ngele okwa gandjwa ooplota ndhoka kehangano lyaAmwele, sha ningwa kwa landulwa oompango.

Shitalangaho okwa yelitha kutya Huhu City okwa ningi eindilo lyooplota dhuunene woosquare metre 20 000 momasiku 19 gaDecemba gwo 2014. Ooplota ndhoka odha li dha ziminwa momutumba gwelelo ngoka gwa ningwa momasiku 22 gaKotomba mo 2015.

Okwa tsikile kutya ongaaka omanga Amwele ina ninga mayola gwondoolopa muDecemba gwo2015.

Aanambelewa oyendji mboka taya longo melelo ngashiingeyi kaya li taya longo mo momvula yo 2015, onkene Amwele ita vulu okuhwahwameka etokolo ndyoka,” Shitalangaho a popi.

Omunambelewa ngoka okwa tsikile natango kutya Amwele okwa pewa omukanda gwe momvula yo2014, ihe ina vula okulonga ehala ndyoka molwaashoka osha li oshitopolwa shetsokumwe kutya otaka mona owala ehala ndyoka uuna lya longwa opo ta vulu oku li tunga. Okwa li woo aniwa a pula opo a pewe ehala tali adhika pokapale koodhila mOndangwa, nopethimbo ndyoka evi ndyoka kalya li lya wapalekwa natango.

Shitalangaho okwa tsikile kutya Amwele nuumvo okwa shangele elelo ndyoka ombaapila, ta pula kombinga yooplota dhe, nelelo olya ningi etokolo momasiku 18 gaMei, opo a pewe ooplota ndatu moExtension 23.

Sho a pulwa ngele Amwele okwa li oshitopolwa shomutumba ngoka gwa ningi etokolo, okwa yamukula kutya ka li oshitopolwa shomutumba ngoka.



KENYA KAMBOWE