Oshigwana sha pulwa shi yambidhidhe elongo

Oshigwana sha pulwa shi yambidhidhe elongoOmakwatho oga nuninwa okukandula omikundu ndhoka dha taalela uuministeli mboka Ominista yElongo oya tula miilonga opoloyeka ndjoka ya nuninwa oshigwana shaNamibia, opo shi vule okugandja omakwatho koshikondo shelongo. Minista Katrina Hanse-Himarwa pethimbo a gandja oshipopiwa shopashigwana shoshikondo shelongo, mEtitano lya piti okwa tseyitha woo etulo miilonga lyoFriends of Education in Namibia Special Initiative (FENSI), opoloyeka ndjoka ya nuninwa Aanamibia ya gandje omakwatho ga nuninwa eyambulepo lyelongo nokwaadha omalalakano goshikondo shelongo.

Okafo komauyelele gopoloyeka ndjoka yoFENSI oka holola kutya oshikondo shelongo osha taalela omikundu odhindji , nepangelo olyo alike itali vulu okukandula po omikundu ndhoka pwaahena eyambidhidho lyoshigwana.

Minista okwa tsu omuthindo kutya FENSI oya nuninwa okundungika oshilonga naakwashigwana kutya oshinakugwanithwa shelongo osha kehe gumwe.

Hanse-Himarwa okwa popi kutya ondungethaneko yoFENSI oye ya po sha landula etalelepo lye miitopolwa omu-14 mo-2015 na okwa mono onkalo moka mu na oshikondo shoka.

Okwa popi kutya pethimbo a ningi etalelepo ndyoka okwa mono onkalo yanayipala moka mu na omagumbo gaalongi, oonguludhoskola, omihandjo dhaanaskola, oombelelwa dhooskola oshowo ompumbwe yomeya nenge olusheno pooskola, oshowo onkalo yaalongi inaya pyokoka. Okwa tsikile kutya okwa mono woo ompumbwe yoongulumambo oshowo omatungo nomaliko guuministeli ngoka geli monkalo itayi monika nawa.

Okwa tsikile kutya onkalo ndjoka otayi uvitha woo nayi sho aalongi naanaskola haya ende iinano iile okuya kooskola.

Minista okwa popi mEtitano kutya omolwa onkalo yopaliko yanaipala ndjoka ya taalela oshigwana, oya tokola okutula miilonga opoloyeka yoludhi ndoka, ndjoka ya nuninwa oshigwana opo shi gandjwe omakwatho koshikondo shelongo.

Okupitila mekwatathano lyoFENSI oshigwana osha pumbwa okugandja omakwatho ngaashi iikulya kooskola ndhoka tadhi kutha ombinga moprogramma yokupalutha aanaskola.Omayambidhidho gamwe ngoka taga pumbiwa ongaashi iimaliwa nenge omakwatho kehe gopaiyemo ngoka ga nuninwa okutunga nokuwapaleka omatungo, oshowo okupangela iikwaniipangitho yelongo mbyoka ya teka mooskola dha yooloka moshilongo.

JANA-MARI SMITH