Omukwiita a ningile omatilitho mayola gwondoolopa

Omukwiita a ningile omatilitho mayola gwondoolopa Omukwiita mEtanga lyEgameno ngoka egumbo lye li Ii momusholondondo gwomagumbo ngoka ga tungwa shaaheli pamulandu aniwa melelo lyondoolopa yaNiipa, na otaga hanagulwapo kelelo lyondoolopa ndjoka okwa popi kutya otaka yaha kehe ngoka ta gumu egumbo lye. Omatilitho ngoka oga ningilwa mayola gwondoolopa ndjoka oshowo aanambelewa yeelo lyondoolopa ndjoka, sha etitha aanambelewa yopolisi opo ya kale taya tonatele oombelelwa dhelelo lyaNiipa.

Momaandaha elelo lyondoolopa yaNiipa, olya li tali pangele okuhanagulapo egumbo lyaTimotteus Ileka ndyoka opo tali tungwa ihe iilonga yehanagulepo lyegumbo ndyoka oya kankama sho Ileka a popi kutya otaka dhipaga kehe ngoka a gumu egumbo lye. Ileka ngoka e li oshilyo shoNDF okwa koleke koNamibian Sun kutya eeno okwa ningile omatilitho gedhipago kehe ngoka taka shanga kegumbo lye kutya kali li pamulandu nenge teli hanagula po. Molwaashoka kape na opolisi mOniipa, elelo lyondoolopa ndjoka olya shangele ombaapila opolisi yaNayena opo yi ka kale po ya gamena aanambelewa mboka taya hanagulapo egumbo lyaIleka. Ombaapila ndjoka ya shangelwa opolisi oya holola kutya: “Nena aaniilonga yetu oya yi yaka tseyithile omukwashigwana ngoka a tungu egumbo lye pwaahena epitiko kutya egumbo lye otali hanagulwa po. Shoka osha landula omalombwelo gontumba ngoka a pewa opo a hulithe po etungo lyegumbo lye.” Ombaapila oya tsikile kutya Ileka ihe okwa yamukula aanambelewa kutya, Olye e ya tumu opo ye mu lombwelendje kutya etungo lye kali li pamulandu. Mayola gwaNiipa, Immanuel Kambode okwa popi kutya omulumentu ngoka ota tungile owina ta gwedha po kutya elelo lyondoolopa oli na okumu ya moshipala opo ka hwahwameke yakwawo nayo ya tameke okutunga.

“Otwa lombwele aantu opo ya talelepo oombelewa dhetu ngele oya hala okutunga naamboka kaye na omapitiko inaya pitikwa okutunga. Ope na omilandu ndhoka Ikela e na okulandula omanga ina tameka okutunga. Itatu longo kohi yelelo lyopamuthigululwakalo we,” Kambode ta ti.

Ileka okwa popi kutya okuuvithwa nayi molwaashoka kutya yamwe otaya pitikwa okutunga omagumbo gawo omanga ye ina pitikwa, okwa popi kutya kashi li pauyuuki.

“Onde ya faalele oompangela dhandje dhokutunga omvula ya piti, ihe oya lombwele ndje kutya itaya zimine ompangela yandje. Omvula ndjika onde ya faalele ishewe ompangela yimwe ihe oye yi tindi, na onda tokola okutameka okutunga molwaashoka aantu otaya tungu.”

Okwa popi kutya sho a tameke okutunga aanambelewa yelelo mwakwatelwa mayola oshowo omunambelewa omukuluntu oye mu lombwele kutya na hulithe po etungo lye, ihe ye okwa tsikile molwaashoka elelo lyondoolopa ndjoka otali ya ihumbatele nayi, lyo inali ya ulukila okaalita kondoolopa. “Ngame omukwaita na onda pyakudhukwa okukondjela etungo lyandje ngaashi tate a kondjele emanguluko lyoshilongo shika na ina galuka okuza mekondjo. Kehe ngoka taka guma etungo lyandje opo ta hulile mpoka. Onda li nda geya ongula yonena na onda ka konga mayola gwondoolopa ihe inandi mu mona,” Ikela a popi. Mayola gwondoolopa nomunambelewa omukuluntu inaya ya kiilonga mEtiyali konima sho kwa ningwa omatilitho ngoka mOmaandaha.

Kambode okwa popi kutya Ileka ita pitikwa opo a tsikile netungo lye na otali hanagulwa po, oya tegelela owala eyamukulo okuza kopolisi.

Ikela okwa popi kutya okwa longitha oshimaliwa shooN$320 000 mokutunga egumbo lye onkene ita pitika li hanagulwepo.



ILENI NANDJATO