Etata lyomiliyona lyapumbiwa mokumana ondhalate yEtosha

Etata lyomiliyona lyapumbiwa mokumana ondhalate yEtosha Oonkambadhala dhokutula ondhalate koshikunino shiinamwenyo shEtosha, otadhi yiwa moshipala kompumbwe yoshimaliwa.

Opoloyeka yetulo ondhalate koshikunino shoka oya tamekele oomvula hamano dha piti, na oya manitha owala oshinano shookilometa 112 shomoshinano shookilometa 822, pauyelele mboka wa gandjwa kominista yomidhingoloko Pohamba Shifeta.

“Muule woomvula hamano dhapiti, oshinano owala shookilometa 112 sha pu noshinano shookilometa 710 osha hupako natango.”

Okwa tsikile kutya oshinano shookilometa 710 shoka sha hupako otashi pula oshimaliwa shoomiliyona 500, opo shi vule okumanithwa.

“Aaniilonga otaya pula oshimaliwa shili pokati komiliyona yimwe noomiliyona mbali mokilometa kehe, na otashi ka pula etata lyobiliyona okumanitha iilonga mbyoka. Ngele kape na iimaliwa nena itatu ka vula okumana iilonga mbyoka,” Shifeta ta ti.

Okwa popi kutya oshinima shimwe tashi etitha opo iilonga mbyoka kayi manithwe, ootendela odha kala nokupewa omahangano ngoka itaga gwanithwa po iilonga.

Shifeta okwa popi woo kutya otaku ka katukilwa oonkatu aanafaalama mboka yeli uushiinda nEtosha, mboka haya tula oondhalate dhawo kondhalate yEtosha, ta popi kutya okwa kala noku kunkilila aanafaalama mboka ihe inaya pulakena omakunkililo ge.

“Oonkatu dhili po okuya owala kompangu ngele inaya kutha ko oondhalate dhawo ndhoka. Etosha oshikunino shopashigwana na kashi shi ehala lyevi lyaayehe,” minista ta ti.



Oshikununo shoka oshi li uushiinda niitopolwa ngaashi Oshikoto, Oshana, Omusati noKunene na oshi na oondhalate dha yooloka na unene ndjoka tayi adhika ko oondjoka yoshinano shoometa 1.2 muule.

Sho a popi kombinga yiikolokosha pokati kiiyamakuti naantu, Shifeta okwa popi kutya nuumvo oonkoshi dha thika po-25 odha dhipagwa. 19 odha dhipagwa shaaheli paveta omanga dha hupako dha dhipagwa kaanambelewa. Oonkoshi hamano odha dhipagwa moshitopolwa shaMusati, yimwe omOshana, ndatu odha pewa uuzigo omanga 9 dha yahwa moKunene. Kape na omuntu a tulwa miipandeko.



Minista okwa tsikile kutya omwaalu gwoonkoshi moshilongo oguli poonkoshi 700, noonkoshi 430 otashi adhika mEtosha, ndyoka lyuuthwa owala okukala noonkoshi 350.

Okwa tsikile kutya oonkoshi otadhi iyakamo moshikunino opo dhi ka konge oondya omolwa oohambo dhaanafaalama ndhoka dha ningwa pooha noshikunino shoka.

Kombinga yoonkoshi ndhoka dha yahwa komunangeshefa

David 'Kambwa' Sheehama Kambwa, okwa patululwa epeko lyopolisi nepeko ndyoka olya ukithwa komupanguli-ndjai opo a vule okuninga etokolo.

Shifeta okwa popi kutya omwaalu gwoongombe dhoka dha popiwa kuKambwa kutya odha dhipagwa mohambo ye kagu li mondjila.



Onga oonkambadhala dhokuyanda iikolokosha mbyoka, Shifeta okwa popi kutya oya tula miilonga omulandu gwekondololo lyoonkoshi.

Omulandu gumwe okutala komwaalu gwiinamwenyo mbyoka tayi vulu okulundululwa uuna kwa holola iikolosha.



Mompangela ndhoka omwa kwatelwa woo okulundululila iinamwenyo mbyoka tayi eta uupyakadhi komahala gamwe, nongele oya tsikile nena otashi ka etitha yi dhipagwe.

ELLANIE SMIT