Ya hala omusholondondo gwoonakutulululwa gu tseyithwe

Ya hala omusholondondo gwoonakutulululwa gu tseyithwe Aantu mboka ya kutha ombinga momutumba gwoonkundathana dhevi moshitopolwa shaHardap oya pula omalelo opo ga pitithe omusholondondo gwaamboka yatulululwa okuputila moprogramma yomatulululo.

Eindilo ndyoka olya landula omauyelele kutya oyendji yomwaamboka ya tulululwa moshitopolwa sha//Karas naHardap oya za moshitopolwa shaShikoto.

Oonakutulululwa oya kwatela mo aaniilonga yomofaalama mboka ya kuthwa moofaalama dhomalanditho konima sho oshilongo shamanguluka. Moonakutulululwa natango omwa kwatelwa Aayelele , oonakulwa aakulu oshowo aaniilonga mboka ya li taya longele omina yaKombat moshitopolwa shaTjozondjupa.

Shoka osha kolekwa kuamushanga muuministeli womatulululo, Peter Amutenya, pethimbo lyoonkundathana dhevi ndhoka dha ningilwa moMariental oshiwike sha piti.

Kuyele nuumvo, Amutenya okwa tindi opo ku pitithwe omusholondondo ngoka, ta popi kutya otagu ka hwahwameka uukwamuhoko.

Amutenya okwa pulwa opo a yelithe kutya omolwashike aakali yomoshitopolwa shoka inaya mona omauwanawa okuza metulululo lyoofaalama dhepangelo 89 moshitopolwa shaHardap oshowo moofaalama 99 moshitopolwa sha//Karas.

Okwa popi kombinga yompumbwe yepangelo okukandulapo omukundu gwaaniilonga mboka ya kuthwa miilonga momina yaKombat, konima sho yapata oshowo Aayelele naaniilonga yomoofaalama mboka hali haya zi moofaalama.

Konyala oopresenda 80 dhevi ndyoka lya landwa miitopolwa mbyoka iyali yomuumbugantu odha pewa aantu ya za moshitopolwa shaShikoto. Okwa ningwa omaindilo gokukutha po omulandu ngoka tagu longithwa monena mokugandja evi.

Omulandu ngoka okwa monika mo kutya otagu tongola aanafaalama mboka aashona. Oshikondo shomatulululo otashi ningi oonkundathana dhi na sha nevi miitopolwa ayihe 14 moshilongo omanga inaku ningwa omutumba gwevi omutiyali moshilongo ngoka tagu ningwa muSeptemba.



FRED GOEIMAN