Epangelo lya kumike aaniilonga yalyo kombinga yoondjambi

Epangelo lya kumike aaniilonga yalyo kombinga yoondjambiOondjambi otadhi ka futwa Uuministeli wEmona lyoshilongo owa ekelehi oolopota dha holoka kutya otashi vulika oondjambi dhaaniilonga yepangelo dhi kale inadhi futwa omwedhi nguka. Oshikondo shEmona osha tindi nomuthindo omapopyo kutya ngele epangelo itali ka futa oondjambi dhiikondo mbyoka yi na omayalulo goombanga geli moondjo.

“Oondjambi otadhi ka futwa ngaashi shito,” omukanda ngoka gwa pitithwa mEtitano kuEsau Mbako ngoka e li omukwatheli gwaMinista Calle Schlettwein, gwa holola.

Omukanda ogwa holola kutya elongekidho lyoondjambi lyomwedhi Mei, olya manithwa nale.

Oshinyolwa shoka sha pitithwa mEtitano, otaku popiwa kutya osha landula omukanda ngoka gwa pitithwa kuamushanga gwoKabinete, George Simataa, ngoka inagu monika koNamibian Sun ogwa holola kutya aniwa aanambelewa aayalulimambo miikondo ayihe yepangelo na ya kwashilipaleke kutya iikondo ayihe mbyoka yi li moondjo komayalulo goombanga dhawo naya wapaleke omayalulo gawo pakufuta ko oondjo ndhoka omanga oondjambi inadhi futwa.

Esiku lyahugunina lya gandjwa, omasiku , 23 Mei 2017.

Minista okwa popi kutya omukanda ngoka gwa pitithwa okukwashilipaleka owala nokudhimbulukitha aanambelewa mboka kutya oya landula omilandu dhepangelo dhefuto lyoondjambi.



Esau okwa yelitha kutya “Oondjambia adhihe dhepangelo ohadhi futwa okupitila momusindalandu gwepangelo gwefuto lyoondjambi naanambelewa ayehe yomayalulo oya pumbwa okwiiyutha komulandu ngoka. Uuna omunambelewa gwomayalulo a pula omwaalu guli pombanda yaangoka gwa pitithwa koTreasury Authorisation Warrant (TAW), nena eindilo ndyoka ohali shunithwa komunambelewa ngoka opo a pule oshimaliwa shi li meni lyomwaalu ngoka tagu pitikwa koTAW.”

“Etseyitho ndyoka okuza kuamushanga gwoKabinete okuya kaanambelewa mboka olya ningwa opo ya dhimbulukithwe yiiyuthe komulandu ngoka.”



Oshikundaneki shimwe po shokoshiwike osha pititha onkundana ndjoka ya holola omukanda tagu popi kutya, epangelo okupitila mUuministeli wEmona muKotomba gwo-2013, olya tula miilonga oshiketha shokutala nokukondolopa epititho lyoondjambi, sho kwa dhidhilikwa kutya okwa li kwa longithwa iimaliwa oyindji miifuta yoondjambi.

Omukanda ngoka ogwa kunkilile aanambelewa aayalulimambo kutya ngele omayalulo goombanga dhiikondo yawo oga adhika moondjo nena epangelo itali ka vula okupula komeho nokufuta oondjambi dhaMei miikondo moka.





Omukanda ngoka gwa pitithwa kuamushanga gwoKabinete ogwa holola kutya epangelo ohali longitha owala omulandu gumwe mefuto lyoondjambi, nongele nena okwa ningwa epuko koshikondo shimwe nena epuko ndyoka otali vulu okuguma iikondo ayihe.

Oshikundaneki shoka osha holola kutya, Simataa okwa popi kutya epangelo otali kongo omulandu gumwe ngoka tagu ka utha opo oondjambi dhaaniionga dhi futwe paikondo ihe sigo ethimbo ndyoka omulandu inagu tulwa miilonga, nena aanambelewa aayalulimambo yiikondo ya yooloka mepangelo oya pumbwa, okwiiyutha komilandu, dhoka tadhi pula opo aluhe omayalulo goombanga dhiikondo yawo ga kale kage li moondjo.

Kuyele muMei, Omuprima Saara Kuugongelwa-Amadhila okwa holola kutya aaniilonga yepangelo ayehe kumwe inamu kwatelwa aanapolotika oshowo aanambelewa yegameno noshikondo shopolisi oyeli 68 000. Okwa gwedha ko kutya aanambelewa yopolisi oshowo oshikondo shegameno otaya ihiilile po- 100 000.

Otaku tengenekwa kutya epangelo ohali longitha oshimaliwa shili pokati koobiliyona 25 no 28 komvula moondjambi dhaaniilonga yepangelo.

Omwedhi nguka oshiputudhilo shoInstitute for Public Policy Research (IPPR) osha kunkilile kutya epangelo ohali longitha omwaalu omunene gwiimaliwa mokufuta oondjambi dhaaniiloga nonkalo ndjoka otashi vulika yi ka tule oshilongo muupyakadhi monakuyiwa.

JANA-MARI SMITH