Aalongimomeya naalongimina taya pula uuyuki

Aalongimomeya naalongimina taya pula uuyuki Ya hala aapanguli mboka ya kwatelele komeho iipotha yawo ya kuthwe miilonga Aaniilonga nale momina yaTCL oshowo aalongi momeya mboka ya kanitha iilonga yawo konima yekanka lyaali pamulandu ndyoka ya ningile momvula yo-2015 oyiimanga kumwe meyambidhidho lyoWorkers Revolutionary Party.

Omukandanyenyeto gwa shainwa kaalongimomeya omayovi oshowo aaniilonga nale momina yaTsumeb ogwa pewa aanambelewa yaaniilonga oshowo yoshikondo shuuyuki mOvenduka, mEtiyali tagu pula opo ku ningwe omakonaakono omolwa uulingilingi wa longwa kaapanguli mOmpangu yoPombanda naanambelewa yuuministeli waaniilonga.

Ongundu ya kwatela mo iilyo yoUnited Fishermen of Namibia, oshowo aaniilonga nale yomina yaTsumeb Corporation Limited (TCL), meyambidhidho lyoWorkers Revolutionary Party, oya gandja omukanda ngoka gu na omalundilo omanene taya ningilwa aanambelewa yaaniilonga oshowo aapanguli mompangu yoPombanda mboka ya kwatele komeho oshipotha shawo.

“Tse aalongi momeya yaUnited Fishermen, oshowo aaniilonga nale yoTCL otwe ku tumine omukanda nguka opo tu ku tseyithile kutya itatu taambako uulingilingi tawu longwa moompangu kohi yelelo lyoye,” ombaapila ya holola.

Ombaapila ndjoka oya popi kutya aanambelewa naapanguli mompangu yaaniilonga oya futwa oombumbo miipotha mbyoka.

Omukandanyenyeto ngoka otagu pula opo ku kuthwe miilonga aapanguli mboka yaali ya kwatele komeho iipotha mbyoka, yaaniilonga mboka.

Omupopiliko gwaalongimomeya mboka, Mathew Lungameni, okwa popi kutya aaniilonga mboka oya hala okuya moonkundathana nepangelo opo ku kandulwe po oshikumungu shoka.

Ongundu yo tuundjoka yaalongimomeya ya thika po-30 oya ningi omunyanyo okuya poombelewa dhUuministeli wAaniilonga, nEtotepo lyoompito dhIilonga mOmbaye, muMaalitsa gwonuumvo.

Oya gandja omukandanyenyeto gawo taya pula opo ku shunwe miilonga aaniilonga mboka ya tidhwa miilonga sha landula ekanka ndyoka lya ningwa muNovemba gwo-2015. Oya pula woo iifuta yawo yomalutayima okutameka mo-2008.

Metiyali, okopi yomukanda gwomanyenyeto omupe oya pewa deputy chief registrar mOmpangu yoPombanda, Steven Rou-Rou, oshowo Supreme Court deputy registrar.

Okopi ya hugunina oya pewa amushanga gwUuministeli wAaniilonga, Bro-Mathew Shinguadja.

Momukandanyenyeto moka aanyenyeti oya popi kutya omupanguli mompangu yoPombanda, Petrus Unengu, ngoka a kwatele komeho oshipotha shawo muDesemba gwo-2015, okwa tindi okupulakena komakemo gawo kutya oshipotha shoka oshi li oshipotha shiimbuluma nakashi shi oshipotha shaaniilonga.

Omukanda natango ogwa nyenyeta kutya omupanguli okwa longitha pambambo oonkondo dhe na okwa ningi etokolo muuwanawa womahangano gokukwata oohi.

Omukanda ogwa tsikile kutya ongundu yaaniilonga mboka ya kuthwa miilonga otayi galukile mompangu molwaashoka oya hala uuyuuki moshipotha shoka.

Omukandanyenyeto ngoka oga holola kutya aaniilonga nale yomina yaTCL oya ningilwa sha faathana mo-2009, sho Ompangu yoPombnda ya pulakene oshipotha shawo.

“Oya ihumbatelwa pwaahena esimaneko, inaya pewa ehala lyokukuutumba ihe oya kala ya thikamekwa ya fa iinamwenyo omanga omupangulita ningi omashendjo nomukalelipo gwopaveta gwelelo lyaTCL na okwa pitika omukalelipo gwopaveta gwopaumwene a kalelepo omukalelipo gwepangelo.Omaindilo ga ningwa kaaniilonga oga tindwa komupanguli Naomi Shivute,” omukanda gwa holola.

Omanyenyeto ngoka ga ningwa mEtiyali ogeli oshitopolwa sholugodhi ndoka talu luwa kaalongi momeya, ndoka lwa tameke muNovemba gwo-2015 sho aaniilonga ya thika po-800 ya yi mekanka.

Pethimbo mpoka aaniilonga oya popi kutya otaya kondjithilwa okulonga oowili oonde na itaku landulwa Ompango yAaniilonga.

Oya nyenyeta woo kombinga yompumbwe yomakwatho guunamiti mefuta.

Omahangano gokukwata oohi oga pingenepo naaniilonga aape aaniilonga mboka ya ningi ekanka na oga tindi okuya kutulula miilonga.

Lungameni okwa popi kutya onkalo omolwa ekanitho lyiilonga oya nayipala nayi noonkondo, nomwaalu omunene gwaniilonga nale mboka oya ikutha oomwenyo muule woomwedhi 18 dha piti.

Isidor Mukuve, ngoka a wayimine ongundu ndjoka oshiwike shika pehala lyaaniilonga nale yoTCL okwa lombwele oNamibia Sun kutya aaniilonga momina ndjoka otaya kongo uuyuuki omolwa iifuta yawo yopenzela mbyoka inayi futwa okuza mo-1996, oshowo oshikumungu shomagumbo gehangano ngoka taga adhika moTsumeb.

Okwa popi kutya iimaliwa yopenzela ya thika pobiliyona yimwe inayi futwa aaniilonga mboka ya thika po-4000.

JANA-MARI SMITH