Valombola a holoka mompangu

Valombola a holoka mompangu Oshipotha shedhipago shoka tashi tamanekelwa omunangeshefa Maurus Valombola (58) osha pulakenwa mOmpangulilo yoPombanda yaShakati mEtitatu.

Valombola ota pangulilwa oshipotha shedhipago lyomunamimvo 32 Benhard Kalimbo ngoka a lyata noshiyenditho konima yoontamanana dhali dha holoka pokati kawo momasiku ga 7 gaFebuluali mo-2013, moshikandjohogololo sha Anamulenge moshitopolwa shaMusati.

Kalimbo okwa hulithile moshipangelo shaShakati, naValombola okwiigandja kopolisi esiku lya landula pOgongo, na okwa kala modholongo konima nkene a tulwa miipandeko.

Omukalelipo gwe gwopaveta okwa popi kutya omuyakulwa gwe ka li e shi uuthemba we pethimbo a ningilwa omapulaapulo pethimbo lyo ku pulakena eindilo lyomboloha ndyoka lya ningilwa mOmpangulilo yaMangesetrata gwa Outapi. Valombola okwa li a kalelwa po ku Inonge Mainga pethimbo ndyoka.

Greyling okwa popi kutya omuyakulwa gwe okwiihumbatelwa nayi nompangu oya li yi na okukwashilipaleka kutya okwa tseyithilwa uuthemba we. Okwa tsikile kutya pethimbo lyomapulaapulo ngoka, omuyakulwa gwe okwa pulwa kombinga yetaaguluko lyompango nale naashika aniwa ka shali sha pumbwa okuningwa.

Valombola okwa li a pewa egeelo lyokufuta oshimaliwa shooN$12 000 oshipotha shedhipago lyaashi lyoshiningilawina.

Omukalelipo gwepangelo moshipotha shoka, Lucius Matota okwa popi kutya Valombola okwa li ena omukalelipo gwopaveta pethimbo ndyoka a li a pulaaapulwa, nomukaleipo gwe okwa li ena okumulombwela kombinga yuuthemba we.

Mutota okwa popi kutya ngele omatompelo gaGreyling oga talika nena shoka otashi pataneke elalakano lyokuningila aatamanekwa omapulaapulo.

Omupanguli Herman Januarie okwa undilile komeho oshipotha shika komasiku 22 gaMei nuumvo.

Valombola ota tsikile no ku kala mondjedhililo.

KENYA KAMBOWE