Omuna gwokombanda gwaNdonga a kanitha otendela yoomiliyona 19

Omuna gwokombanda gwaNdonga a kanitha otendela yoomiliyona 19 ODC a popi kutya oompango dhokondalaka odha taagulukwa Ehangano lyedhina Offshore Development Company (ODC) olya kutha oonkondo otendela ndjoka yali ya pewa ehangano lyomwanakadhona gwomukwaniilwa gwandonga Katrina Elifas ndjoka lyedhina Katrina Enterprises momumvo 2013.



Elifas pamwe nookume ke mongeshefa AaChina oyali yapewa otendela yoomiliyona 19 okutunga ehala lyoongeshefa oonshona no dhopokati pomataagulukilo goongamba pOmahenene mOshitopolwa shaMusati.

Otendela ndjika ngashiingeyi oya pewa ehangano lyedhina Omusati Construction.

Ehangano lyo ODC olya popi kutya ehangano lyaKatrina Enterprises olya yi pambambo mokuyonagula euvathano-tsokumwe sho lyiiteka nokuthigapo iilonga yopoloyeka ndjika ethimbo lyuule woomvula mbali.

Elifas okwali ayi meuvathano-tsokumwe okulongela kumwe nehangano lyaChina lyedhina Zhen Jiang Construction and Engineering, kakele oyali ya thigi po iilonga mo -2014.

Iilonga yOpoloyeka oyali yi na okukala ya manithwa mo-2015 ihe aatungi oyali yahulile ondjilakati miilonga noopelesenda 65%, mpoka yiiteka nokweetha iilonga ina yipwa.



Omunambelewa Omukuluntu gwo ODC Phillip Namundjebo okwa lombwele oNamibian Sun kutya otendela nehangano lyoKatrina Enterprises oya hulithwapo omolwa eyo pondje lyeuvathano-etsokumwe.

Okwa ti, euvathano olya yelitha nawa kutya omugandji gwiilonga ODC ota vulu okuhulithapo otendela ngele nakupewa iilonga okwandopa okumanitha iilonga nenge a hulile ondjilakati.

“Ngele oto dhimbulukwa nawa, ehangano ndika olya li lyathigi po ehala lyiilonga muDesemba gwo-2014 naashika oshili eyonagulo lyeuvathano-tsokumwe.

Okondalaka oya yelitha nawa kutya ngele nakupewa otendela okwa yi pondje ompango yokondalaka nena otendela otayi vulu oku pewa ehangano limwe,” Namundjebo ta ti.

“Uuna iilonga ya manithwa nena iifuta otayi ka ningwa ngaashi okondalaka tayi utha. Eyooloko lyomwaalu ngoka tagu thigala po otali ka futwa ODC kehangano lyoKatrina Enterprises pamwe nookume ke ngaashi okondalaka tayi ti.”

Pahapu dhaElifas, omanga inaya thiga po ehala lyiilonga mo-2014, aayindjinia yopoloyeka ndjoka, yehangano lyoBurmeister and Partners, oya nyenyeta koODC kutya iitenda yoombuli mbyoka tayi longithwa kehangano lyawo oyongushu yopevi.

Ombaapila ndjoka ya monika koNamibian Sun, ya shangwa muNovemba gwo-2015, yuukithwa kehangano lyoBurmeister and Partners ya nyolwa ku Elifas, oya pula opo ehangano li yelithe nawa ongushu yiitenda mbyoka ya longithwa.

“Otandi pula opo mu yelithe pamushangwa gwopambelewa kutya omakonaako geni taga pumbiwa okumuna ongushu yiitenda mbyoka tatu longitha.

Ngele ope na omakonaakono gopaundhindoli otatu indile mu tupe omakwatathano opo tu pule komeho kaatushunithe iilonga konima,” ombaapila ndjoka ya holola.

Mo- 2015, ehangano lyoKatrina Enterprises olya shangitha oshipotha nelelo lyo ODC kutya ODC okwa ulike omuthaneki gwopoloyeka oye ta etitha epiyagano naashika osha etitha omutungi a thige po ehala lyiilonga.

Opwa piti omvula, opoloyeka ndjoka inayi longwa nehangano lyo ODC olya ulike ehangano lyoNamibian Council for Architects and Quantity Surveyors (NCAQS) li konaakone oshikumungu shoka.

Mo-2015, NCAQS okwa ulike ehangano lyoMwanakatwe Studio Architecture Inc li kale omupokati moshipotha.

Momasiku 23 gaFebruali 2016, mombaapila ndjoka ya monika koNamibian Sun, Mwanakatwe Studio Architecture Inc okwa ningi etokolo li li muuwanawa waKatrina Enterprises, ihe ODC noBurmeister and Partners inaya nyanyukilwa etokolo ndyoka lya ningwa.

“Otashi ende ngiini ya ka ulike omutungi omupe omanga omupokati a ninga nale etokolo. Oya pumbwa okufuta iilonga yetu yoopresenda 65 mbyoka twa longo, ngele hasho otatu ka kuthathanapo mompangu. Otaya popi kutya iitenda yetu oyongushu yopevi ihe otaya tsikile ngaa nokuyilongitha,” Elifas ta ti.