Ondondo yomeya moondama otayi londo pombanda

Ondondo yomeya moondama otayi londo pombanda Ondama yaVon Bach oya thikama poopresenda 54.4 Omvula onene ndjoka ya loko moshilongo iiwike ya piti, oya etitha opo ondjele yomeya moondama dhokupungula omeya moshilongo yi londe pombanda.

Omvula ndjoka ya loko miitopolwa ya yooloka moshilongo okwa lopotwa yeeta elunduloko lyondjele yomeya moondama dhomoshilongo, unene nOndama yaSwakoppoort ndjoka ya kala owala poopresenda 19.5., okutameka omwedhi Februali.

Palopota ndjoka ya tseyithilwa kehangano lyaNamWater, Ondama ya Swakoppoort monena oyuudha noopresenda 31.7 okuyeleka noopresenda 12.2 momasiku 27 gaFebruali.

Oondama dhimwe po ndhoka dha mono omeya ogendji natango ongaashi Ondama yaVon Bach ndjoka monena yili poopresenda 54.5%, okuyeleka noopresenda 42.8 mpoka ya li oshiwike sha piti.

Ondama yaMatako oyuudha noopresenda 60, okuyelaka noopresenda 53.3 mpoka ya li oshiwike sha piti.

Otashi ulike kutya oondama ndatu ndhoka oonene moshilongo odhuudha noopresenda 46.7 , okuyelaka noopresenda 33.3 mpoka dha li mOmaandaha goshiwike sha piti.



Muumbugantu woshilongo, Ondama yaHardap oyuudha noopresenda 72, niiyelo yondama ndjoka oya egululwa mEtine lya piti nOmetitano opo omeya gamwe ga pite mo sha landula omvula onene ndjoka ya loko momudhingoloko ngoka. Ondama yaMaruru Delta oya mono omeya lyotango nkene yiihulile okukala nomeya mo-2011. Monena oyi na omeya goondjele yoopresenda 4.2.

Oshiwike sha piti, ekuthikuthi lyomeya gefundja olya a dha iishana yomonooli yaNamibia. Kwiikwatelelwa koonkundana kombinga yefundja ndhoka dha pitithwa koHydrological Service mEtitano lya piti, omeya miishana mOmpundja oga yelekwa noometa 1.25, moShaneheke 0.51 , Shanalumono 0.67 nomEndola omeya oga yelekwa nondjele yoometa 0.90.

Metitano, ondjele yomeya mOmulonga gwaZambezi moKatima Mulilo oya li poometa 2.66 okuyeleka noometa 3.8 pethimbo lya faathana omvula ya piti.

MoRundu, Omulonga gwaKavango ogwa yelekwa poometa 5.15 okuyeleka noometa 5.84, dhoka dha yelekwa pethimbo lya faathana omvula ya piti.

Ondjele yomeya mOmulonga gwaRange, posasiyona yaBlouputs oya ulike e yo pombanda eshona noocendimeta 3 na oya li poometa 0.68 mEtitano.

JANA-MARI SMITH