Omvula ya yonagula omaliko moKatutura

Omvula ya yonagula omaliko moKatutura Nonando ongaaka oyendji otaya pula natango Shiyenga shaNangombe yi tsikile nokutilahi omeya Aakalimo oyendji mOvenduka oya pandula omuloka ngoka gwa dhenge oshilandopangelo omasiku ngaka, kakele ogwa thigile aanegumbo yamwe ofogo, meyonagulo lyomaliko.

Boame Melesano, omunegumbo nomusili shimpwiyu shaantu omulongo mOkuryangava moshikandjohogololo shaTobias Hainyeko moKatutura okwa popi kutya iipundi ye yomasofa oshowo ombete yaanona ye oya yonagulwa komeya ngoka geya sigo omegumbo.

Melesano okwa ti, shika osho oshikando shotango egumbo lye tali ya komeya, na kaye na shoka ye na okuninga ngaashingeyi ihe oyena owala okutegelela omvula yisheke yo ya vule okukukutika iinima yawo.

Melesano ngoka e li omuhingi gwotaxi okwa popi kutya okwa longitha oshimaliwa shooN$300 okulanda evi lyokututila pegumbo lye likale megameno.

Nonando omvula ya yonagula omaliko gawo, Melesano pamwe negumbo lye oya popi kutya oya hala omvula yi tsikile molwaashoka moshilando omwa kala ompumbwe yomeya, nonando yena uupyakadhi womaliko gawo ngoka ga yonagulwa komeya gomvula.

Aanegumbo yamwe wo mboka yathigwa pomutenya komvula oye omunamimvo 52, Festus Matheus, ngoka egumbo lye talama omeya aluhe ngele ta kulokwa.

“Egumbo lyandje olya kulupa, ngame ihandi longo. uuna taku lokwa ngame nomukulukadhi gwandje ohatu talako owala katu na nkene,” Matheus ta ti.

Matheus okwa popi kutya hasho oshikando shotango egumbo lye tali udha omeya uuna taku lokwa. “Aluhe egumbo lyandje ohali udha omeya uuna taku lokwa, otu li popepi nomulamba.”

Okwa tsikile kutya ngele ope na ompito ta vulu okutembukila pehala ewanawa, andola oteshi ningi opo a hupithe omaliko ge.

Ngaashi Melesano, Matheus naye okwa popi kutya omvula oya pumbiwa na oyi li eyambeko nonando tayi yonagula iinima.

MICHAEL KAYUNDE