Konyala aantu e-100 ya sila moondjila

Konyala aantu e-100 ya sila moondjila Aantu 29 oya hulithile miiponga yomoondjila pokati komasiku 27 gaDesemba nOmaandaha na osha etitha omwaalu gwaantu ya sila miiponga yomoondjila pethimbo lyiituthi yomatango omanene nuumvo paantu 94.

Nonando omwaalu gwiiponga ogwa shuna pevi nuumvo noopresenda 9 oshowo omayehameko noopresenda 16 omwaalu gwaamboka ya hulitha inagu lunduluka. Omvula ya piti, aantu 95 oya hulithila miiponga pokati komasiku 22 gaNovemba nomasiku gaali gaJanuari.

Pokati komasiku 27 gaDesemba sigo gaali gaJanurai, oshikondo shekondololo lyoondjila mopolisi yaNamibia osha gandja uutekete womageelo wuli 962 woongushu yooN$861 250. Omageelo ogendji oga pewa mboka taya hingi yaana omikanda dhokuhinga, okuhingilila oshowo okuhinga inaya imangelamo momapaya.

Okutameka momasiku 22 gaNovemba okwa gandjwa omageelo geli 7 669 gongushu yoomiliyona 8.3.

Omiyalu dha gandjwa koMotor Vehicle Accident (MVA) Fund odha ulike kutya pokati komasiku 22 gaNovemba nOmaandaha goshiwike shika, okwa lopotwa iiponga 480 okuyeleka niiponga 530 ya lopotwa pethimbo lya faathana omvula ya piti.

Omwaalu gwaamboka ya ehamekwa oguli po-894 okuyeleka naantu 1 062 ya ehamekwa omvula ya piti, pethimbo lya faathana.

Iihauto tayi galangata oshimwe shomiiponga mbyoka ya holoka unene sha landulwa komaipumo mumwe niiponga mwa kwatelwa aayendi yokolupadhi.

Omaso 94 ga lopotwa oopresenda 66 odhaalumentu omanga omvula 71 odha li dhaaluumentu. Miitopolwa moka mwa lopotwa omaso ogendji ongaashi mOtjozondjupa, moka antu 14 ya hulitha, Khomas noKunene omaso 12 omanga Omusati nOshana omaso 10.

Aantu omugoyi oya hulitha mOhangwena, 7 mo Hardap naantu yatano mOshikoto nOmaheke. Moshitopolwa sha //Karas, Erongo naZambezi omwa si aantu yatatu.

Aanambelewa yekondololo lyoondjila oya kankameke iihauto 103 199 nuumvo pethimbo lyiituthi yomatango omanene nokuningila omakonaakono aahingi 21 542 mboka ya talika ngele oya longitha iikolitha pethimbo taya hingi oshowo okuningila omakonaakono iihauto 13 065 okutala ngele otayi vulu tuu okukala kopate.

Aantu 132 oya tulwa miipandeko shoo ya longitha iikolitha nomwaalu omunene ogwa lopotwa moKaras moka mwa tulwa miipandeko aantu 30, 26 omErongo no-21 moKavango East.

caption

JANA-MARI SMITH