Hulithenipo uukongo ngashiingeyi!

Hulithenipo uukongo ngashiingeyi! Aachina oyendji otaya kutha ombinga miimbuluma tayi ningilwa iiyamakuti yaNamibia Omahangano gomidhingoloko ga thika po-40 moshilongo oga gandja ekunkililo kaakwashigwana yaChina mboka taya longo iikulumuna moshilongo. Omahangano ngoka oga holola okuva nayi omolwa omiyonena tadhi ningilwa iiyamakuti unene kaakwashigwana yaChina mboka yeli moNamibia. Omukanda gwekunkililo ngoka gwa yambidhidhwa komahangano ga thikao-40 ogwa pewa Ombelewa yOmukalelipo gwaChina moNamibia.

Omukanda ngoka ogwa shangwa kOmunambelewa Omukuluntu gwoNamibian Chamber of Environment, Chris Brown ngoka a popi kutya Aachina oya etitha ekanitho lya thika poomiliyona 800 koshikondo shiiyamakuti oshowo omidhingoloko moshilongo.

Ombaapila ndjoka ya shangwa oya shangwa konima owala yoshiwike shimwe sho aanangeshefa Aachina ya ningi nomutumba nOpolisi yaNamibia nokukundathana onkalo kombinga yomwaalu onene gwaakwashigwana mboka taya kutha ombinga muukongo waali paveta.

Brown okwa popi kutya Aanamibia oye uvite nayi molwaashoka Ombelewa yomukalelipo gwaChina oshowo Epangelo lyaChina inaya katuka oonkatu dha sha okuya moshipala onkalo ndjoka.

Brown okwa popi kutya muule wiiwike yapiti, aakwashigwana yaChina oya tulwa miipandeko na otaya tamanekelwa iipotha yi na sha nuukongo waali paveta, mwakwatelwa okukala nooniga dhoompanda oshowo iiyamakuti yilwe inayi pitikwa. Okwa popi kutya Aachina oyendji otaya yi pondje ompango yomidhingoloko yaNamibia naashoka otashi e ta ongeyo mokati koshigwana shaNamibia.

Okwa popi kutya nonando kaye shi Aachina ayehe taya pogola ompango yegamenenepo lyiiyamakuti yaNamibia, oye wete kutya onkalo yaChina mboka otaya pogola onene noonkondo. Okwa popi nonando kutya Aachina otaya yi konyala miitopolwa ayihe moshilongo nokutotapo oongeshefa dhawo nokwiimonena oomikanda dhokuminao onzo dhopaushitwe, onkalo yuukongo waali paveta mboka tawu ningilwa iiyamakuti moshilongo kaaChina oya londa pombanda.

Okwa popi kutya Aachina otaya kutha ombinga muukongo mboka tawu etitha edhipago lyoompanda oshowo oondjamba moshilongo, nokutuma pondje yoshilongo ooniiga dhoompanda nomayego goondjamba.

Okwa gedha po kutya etseyitho ndyoka lya ningwa kutya aanangeshefa yaChina oya gandja oshimaliwa thika poo-N$30 000 mokukondjitha uukongo wali paveta, shoka oshi li etukaano koshikondo shomidhingoloko shaNamibia molwaaashoka eyonagulo ya ningwa kaakwashigwana mboka olya thikama lyopoomiliyona 811.

Ombaapila ndjoka oya gandjwa mEtitatu lyoshiwike shapiti, naaChina ya thika pe-100 oya ningi ehololomadhilaadhilo moRundu yeli ompinge nuukongo waali paveta na oya pula opo omapangelo giilongo mbika iyali ga gandje omageelo koonakupogola.



ELLANIE SMIT