Oskola ayihe ya ndopa ondondo onti-10

Oskola ayihe ya ndopa ondondo onti-10 Aayelele aniwa inaya simaneka elongo Osekundoskola yaTsintsabis mOshitopolwa shaShikoto oya ndopa anaskola ayehe18 mboka ya shanga ondondo onti-10 nuumvo. Omiyalu dhoka dha monika po odha koleke kutya iizemo yoskola ndjoka onkene tayi tsikile okugwa pevi kehe omvula sho aalongwa owala yane yomaalongwa 14 mboka ya shanga ekonaakono lyondondo onti-10 moskola ndjoka mo2013 ya piti, omanga mo-2014 aalongwa owala yane yomaalongwa 17. Omvula ya piti natango moskola ndjoka omwa piti owala aalongwa yane yomaalongwa 16.

Sho a ningilwa omapulaapulo kombinga yonkalo yoskola ndjoka, omupeha gwelongo mOshikoto Vilho Shipwata okwa popi kutya onkalo ndjoka ta vulu okutumbula oondjoka owala kutya oskola ndjoka unene oyi na aakwashigwana yomuhoko gwAayelele.

Shipwata okwa popi kutya onkalo yendopo moskola ndjoka osho ya kala ngaaka oomvula dha piti, nonuumvo oya hwangwa unene sho kape na omunaskola gumwe a piti.

Omukuluntuskola nale poskola ndjoka Beatrice Kaula okwa lombwele oNamibian Sun kutya aanona ayehe mboka kaye na omagano ohaya tumwa koskola ndjoka okuza pooskola dhopomudhingoloko. Kaula okwa koleke kutya iizemo yoskola ndjoka itayi shambula nonando okwa kambadhala oshindji mwakwatelwa ootundi dhomutenya.

Okwa tsikile kutya endopo poskola ndjoka otali hwahwamekwa woo konkalo kutya elongo inali simanekwa unene mokati kaakwashigwana yomuhko gwAayelele molwaashoka aakuluntu inaya simaneka elongo naanona oyendji ihaya yi nokuli sigo okondondo onti-2.

Kaula okwa tsikile kutya oskola ndjoka ohayi gandja owala omuhandjo kaanaskola 19 omanga yalwe haya zi poombashu dhomomudhingoloko molwaashoka aakuluntu yawo aaniilonga moofaalama dhopopepi.

Nonando ongaaka omunapaliamende gwoDTA, Jennifer van den Heever, ota gandja uusama koshikondo shelongo kutya osha ndopa okulundulula omulandu gwelongo nokugu ninga gukale gwa wapalela aantu ayehe mwakwatelwa mboka yomuhoko gwAayelele.

“Omusindalandu gwelongo itagu pitikwa gukale tagu tongola ngaka. Osha hala okutya aanona yAayelele omalayi molwaashoka ihatu mono endopo lyoludhi ndoka momidhingoloko dhilwe?” Van den Heever a pula. Okwa popi kutya uuministeli nawu yelithe kombinga yonkalo ndjoka.

Omuhwahwameki guuthemba womuntu, Rosa Namises okwa popi kutya onkalo yoskola yaTsintsabis oya piyagana nongele oya tsikile nena akokele momudhingoloko ngoka itaya ka mona monkalamwenyo aanona ya pondola sha. Okwa popi kutya Aayelele ina ya simanekwa onga aakwashigwana yoshilongo shika na kaye na nookuli oonkatu dhopombanda.

Omapopyo ga faathana oga ningilwa oskola yedhina Kephas Muzuma Combined School mOshitopolwa shaKunene ndjoka nayo ya ndopa aanaskola ayehe ya shanga ondondo onti-10. Natango oskola yaOtjerundu Combined School moKunene omwa piti owala omunaskola gumwe mokati kaanaskola 18 mboka ya shanga ondondo onti-10.

Omukuluntu gwelongo moshitopolwa shoka, Angeline Steenkamp ngoka opo a tameke iilonga muSepetemba okwa popi kutya endopo ndyoka otashi vulika lyeetithwa konkalo kutya ooskola dhoka opo owala dha tamekitha ekonaakono ndyoka omvula ya piti.

Okwa ti nonando ongaaka okwa ningwa oonkambadhala ngaashi egandjo lyomambo ga gwana oshowo ootundi dhomutenya opo aanaskola ya vule oku yambidhidhwa melongo lyawo.



JEMIMA BEUKES