Iizemo yondondo onti-12, yopombanda ya yambukapo

Iizemo yondondo onti-12, yopombanda ya yambukapo Ominista yElongo, Katrina Hanse-Himarwa okwa popi kutya iizemo yondondo 12, ondondo yopombanda oya ulike kutya oyendji mboka ya shanga ekonaakono ndyoka oya mono iitsa tayi ya falitha kiiputudhilo yopombanda.

Minista okwa popi kutya iizemo yiilongwa ngashi Accounting, Arts and Design, Keyboard and Processing nOmalaka gAafrika oya gumwa noonkondo omolwa ompumbwe yaalongi. Minista okwa popi kutya opo ku kandulwepo uupyakadhi mboka okwa ya moonkundathana noNamibia Students Financial Aid Fund (NSFAF) opo iilongwa mbyoka yi talikeko nomeho omanene.

Okwa ekelehi omapopyo kutya ekanka lyaalongiskola ndyoka lya ningwa uule wesiku limwe olya guma iizemo mbyoka. Okwa tsikile kutya aanaskola oye shi enditha nawa miilongwa mbyoka yali ya gumwa kekanka ndyoka lya ningwa.



Iilongwa mbyoka yali ya gumwa oLife Science nOmwaalu.



Omunaskola dhingi mekonaakono ndyoka oRenathe Potgieter gwomoskola yaWalvis Bay Private School. Okwa lombwele oshifokundanaeki shika kutya, okwa hala okwiilongela uunamiti na okwa popi kutya okwe shi enditha nawa omolwa eyambidhidho okuza kofamili ye naalongi ye.

“Ondi ilongo tandi longitha omukalo ngoka aantu ya indikendje okulongitha- okulesha ndi na okambishi kandje komatundji. Osha kwathelandje oshowo okulonga nuudhiginini,” Potgieter ta ti.



Tsengelmaa Sundui gwomoskola yaSt. Paul’s College okwe ya omutiyali na okwa popi kutya aluhe okwa kambadhala okukala gwotango miinima ayihe. Okwa hala anuwa a kale pevi manga uule womvula yo—2017.

“Otandi kondjo nashoka nda hala okwiilongela, onkene onda hala okukutha omvula yuudha opo ndi dhilaadhile nawa. Otandi nyengwa okutokola pokati kokwiilongela uuindjinia oshowo oekonomi.”

Blessing Chizengeya a za moSt. Boniface College oku li ponomola ontitatu na okwa popi kutya okwa hala okwiilongela uunamiti.

JEMIMA BEUKES