Swapo a hala uukumwe

Swapo a hala uukumweShaningwa a zimine kutya ope na uupyakadhi Olutu olunene lyomadhilongo mongudu yoSwapo olwa pulwa opo lu tule miilonga omilandu dhoka tadhi vulu okweeta omalunduluko mongundu ndjoka. JEMIMA BEUKES

Onga oonkambadhala okushuna monkalo moka ya li nale onga ongundu kamana moshilongo ashihe, Swapo okwa tamekitha ekongo lyuukumwe mokati kaayambidhidhi niilyo.

Amushanga gwongundu ndjoka Sophia Shaningwa pethimbo kwa patululwa oshigongiilonga sholutu lwoThink Tank, okwa popi kutya ongundu oya limbililwa kaahogololi mboka ya kambadhala okugandja ombedhi kongundu ndjoka, pethimbo lyomahogololo ga piti.

Osha li oshikando shotango ongundu tayi mono iizemo yi li ngaaka konima nkene oshilongo sha manguluka naShaningwa okwa zimine kutya ongundu oya pumbwa okutulwa kumwe.

Amushanga ngoka okwa pula olutu lwoThink Tank lu konge oondunge tadhi vulu okulongithwa mokweeta uukumwe mongundu ndjoka.

Shaningwa okwa popi kutya olutu inalu tula owala pamishangwa oondungethaneko dhoka nenge lu tumbule iitya tayi shambula ihe oongungethaneko dhoka nadhi tulwe miilonga

Helmut Angula okwa pulwa opo a topole omayele ge nolutu ndoka, Shaningwa ta popi kutya okugalula aantu ngaashi yooAngula osha pumbiwa molwaashoka ongundu itayi vulu we okweekelahi aanamadhilaadhilo yawo omolwa etopoko.

Angula okwa li omupopiliko gwongundu omanga omahogololo gaaleli yongundu gomo 2017 inaga ningwa, na okwa kanitha opoosa ndjoka sho a kanitha momahogololo guupeha presidende.

Angula ngoka a li gumwe gwomaagandji yuusama kelelo lyaSwapo okwa popi kutya otaya thiminikwa opo yiiyunganeke mehupitho lyaSwapo.

Pahapu dhomunongononi gwopolotika, Ndumba Kamwanyah, omapopyo gamushanga pethimbo lyepatululo lyoshigongiilonga shoka, otaga halutha.

Okwa popi kutya oshi li oshikando shotango gumwe gwomaaleli mongundu ndjoka ta popi kutya iinima kalyi li nawa ngaashi ya kala, nonando osha kala nokupopiwa miikundaneki ihe oya kala taya gamene kutya ayihe oyili nawa.