Aaniilonga yaSpar taya ningwa nayi

Aaniilonga yaSpar taya ningwa nayiItaya futwa oowili dholutayima Aaaniilonga yomostola yaSpar moondoolopa ndatu dhomonooli oya ningi omunyanyo oshiwike sha piti, taya nyenyeta kutya oya loloka okuningwa nayi kaahona yawo. TUYEIMO HAIDULA









OSHAKATI

Aaniilonga yostola yoSpar mondoolopa yaShakati, Ongwediva oshowo Ondangwa moshitopolwa shaShana otaya pula eidhopomo lyakomufala gwaaniilonga monkalo yawo yiilonga oshowo omatukano ngoka taya ningilwa komuhona gwawo. Metine lyoshiwke sha piti aaniilonga oya ningi ehololomadhilaadhilo lyopambili nokugandja omukandanyenyeto gwawo komukwatheli gwamenindjela Mostar yaShakati, Ivette Mouton.

Elina Shafodino ngoka a lesha omukandanyenyeto pehala lyaaniilonga pamwe naye, okwa popi kyuya inaya nyanyukilwa omukalo ngoka taya ihumbatelwa molwashooka oye wete kutya otaya hepekwa. Aaniilonga oya popi kutya otaya tidhwa woo miilonga pwaahena elandulo lyomilandu okuza kaakomeho yawo mboka ina simaneka oompango dhaaniilonga moNamibia. Okwa popi kutya otaya pula elelo lyaSpar li kuthe miilonga menindjela gwostola ndjoka mOshakati.

Dhimwe dhomomikundu dha popiwa kaaniilonga mboka okulonga oowili oonde pwaahena iifuta yolutayima.

“Aanilonga otaya thiminikwa okufutila iinima mbyoka ya pakelwa moonayilona dhookastoma papuko uuna ya monika koosekuliti pomweelo. Aaniilonga otaya thiminikwa okulanda iinima mbyoka ya yonuka mostola. Omikalo dhoka nadhi ye pehulilo okuya momasiku 30 gaKotomba. Omambandameko, omatukano iitya yuukwamuhoko iinima ya kehe esiku moSpar. Aaniilonga mboka yopakathimbo naya pewe ethimbo lya gwana nenge ya tseyithilwe mbala kombinga yomalufo gawo, naya yambidhidhwe woo niimaliwa yoolefa oshowo yomahala gokuza."

Ehangano lyoRevolutionary Union oshowo oNamibia Food and Allied Workers Union (Nafau) oya kalelep aaniilonga.

Mouton okwa popi kutya otaka gandja omukanda ngoka na okwa uvaneke taka gandja eyamukulo mbala.