Ramatex taka longithwa mokuninga omapekaapeko guunamiti

Ramatex taka longithwa mokuninga omapekaapeko guunamiti Endiki lyoRamatex moshilandopangelo okwa tokolwa li ka longithwe onga ehala lyokuningila omapekaapeko gopaunamiti moshilongo, pauyelele mboka wa gandjwa kominista nale yuundjolowele. JEMIMA BEUKES

OVENDUKA

Ø Taya ka tala unene komikithi dhoka hadhi taandele

Ominista nale yuundjolowele Omundohotola Bernard Haufiku okwa popi kutya otaya ka tula ponomola yotango eningo lyomapekaapeko gopaunamiti oshowo ehwahwameko lyegandjo lyuunamiti wongushu, tashi ka ningilwa mendiki nale lyoRamatex mOvenduka, ndyoka tali ningwa po oshipangelo.

Okwa popi kutya oye na ondjodhi yokunkondopeka eningo lyomapekaapeko gomikithi melongelo kumwe naaningi yomakonaakono yopaigwana.

Haufiku okwa popi kutya omayakulo ngoka itaga ka kala goshali molwaashoka otamu ka kala mu na aapangi noondokotola oshowo omayakulo gamwe,na otaya ka pumbwa woo okufuta omayakulo ngaashi olusheno nomeya.

Pahapu dhaHaufiku opoloyeka ndjoka otayi ka longa onga ehangano lyaashi lyopapangelo na kali na elalakano lyokwiilikolela iiyemo, na otaya ka tala unene komikithi dhoka hadhi taandele, mwakwatelwa oCovid-19.

Haufiku okwa tsikile kutya nonando iipotha yoCovid-19 otayi shuna pevi omolwa ondjele yili pombanda yaamboka yatuntilwa, okwa popi kutya omukithi ngoka itagu shuna owala ngaaka.

Okwa tsikile kutya otaku vulu okuholoka natango oshiluku shetaandelo lyomukuthi goka, na otaku kala ngaa iipotha yomukuthi ngoka uule wokathimbo.