Opolisi itayi vulu okumangapo aapogoli yomilandu dhoCovid-19 Omafumbiko gaanenentu mboka ya hulitha koCovid-19 otaga udha noonkondo aalilisa nokuya pondje yomilandu dha tulwa miilonga ngashiingeyi mokukandeka oCovid-19, ihe opolisi oyiiyadha monkalo ya piyagana. JEMIMA BEUKES NAOGONE TLHAGEOVENDUKA
Ø Oondjeedhililo dhuudha nayi
Omukomeho gwOpolisi yaNamibia Sebastian Ndeitunga okwa popi kutya oondjeedhililo odhuudha noonkondo onkene mboka taya yi pondje omilandu dhoCovid-19 itaya vulu okutulwamo.
Okwa popi ngaaka konima sho a ningilwa omapulo kutya omolwashike efumbiko lyominista nale yomidhingoloko, Willem Konjore, lya kala naantu ye vulithe pomulongo nokuya pondje omilandu dhoCovid-19.
Aantu yomwaalu omunene oya monika woo ya kuutumba pondje yegumbo lyomuleli gwAaHereo Advocate Vekuii Rukoro, ngoka a hulitha konima yoshiwike ngashiingeyi omolwa oCovid-19.
Opolisi oya popi kutya oyiiyadha monkalo yapiyagana na oya mangwa kiikaha sho oondjeedhililo moka mu na okutulwa aantu mboka dhuudha.
“Oondjeedhililo odhuudha, otatu ya tula peni, nangoye oto fala natango ombuto koondjeedhililo. Ondjeedhililo odhuudha shapitilila, kashi li paundjolowele, otatu ya tula peni,” omukomeho gwopolisi a yamukula sho a pulwa.
Ndeitunga okwa popi kutya aantu naya uveko owala nokukoneka oshiponga tashi etithwa koCovid-19 na inaya tegelela ya lombwelwe kopolisi shoka ye na okuninga naashoka inaya pumbwa okuninga molwaashoka kehe gumwe okushi oshiponga shombuto ndjoka.
Aantu onkene taya tsikile nokupogola omilandu dhoka dha tulwa miilonga mokukandeka oCovid-19 pethimbo mpoka oshilongo shi li monkugo yi na onkambe omolwa etaandelo enene lyombuto ndjoka oshowo omwaalu omunene gwaantu taya hulitha okuza kombuto ndjoka.
Molyomakaya oshilongo osha lopota iipotha yoCovid-19 yi li pe 1007 oshowo omaso ge li 55.
Ominista yuundjolowele Kalumbi Shangula okwa popi kutya oya dhidhilike omwaalu guli pombanda gwaantu taya hulithile momagumbo. Okwa popi kutya ope na uumbangi kutya aantu otaya ipanga momagumbo nomapango inaga kolekwa na okwa kunkilile oshigwana shi konge omakwatho kiipangelo meendelelo ngele ye na uudhigu okufudha nenge uuwehame nontulo, nenge itaya vulu okukotha nenge okupenduka.
Okwa tsikile kutya oshilongo osha dhidhilike omwaalu guli pombanda gwomaso maantu mboka inaya tuntilwa ta pula oshigwana opo shi ka tuntilwe sho shiyande uuvu uunene nenge omaso onga oshizemo shoCovid-19.
Omupresidende Hage Geingob, ngoka a pata manga Okahandja-Ovenduka-Rehoboth okwa tegelelwa a ka popithe oshigwana oshiwike shika na otashi vulika epato ndyoka li kale natango miilonga omolwa omwaalu omunene gwiipotha yoCovid-19 mbyoka taya tsikile okulopotwa moshilongo.