Iitopolwa yahepa ya mono ookota dhoohi ooshona

Iitopolwa yahepa ya mono ookota dhoohi ooshonaIitopolwa mbyoka tayi dhengwa koluhepo moshilongo okwa lopotwa ya mono ookota dhokukwata oohi ooshona lela, sha landula etseyitho lyaamboka ya mono uuthemba wokukwata oohi olweetho nduka. Khomas a mono oopresenda dhili pombanda OGONE TLHAGE







OVENDUKA

Kwiikwatelela ketseyitho ndyoka lya ningwa oshiwike sha piti kOminista yOohi nOonzo dhomOmeya, Albert Kawana, iitopolwa ngaashi Kavango East oshowo West, Omaheke, Kunene, Oshana oshowo Zambezi oya mono oopresenda dhuumwene wokukwata oohi inadhi pitilila poopresenda 4 kehe koshitopolwa.

Omaheke oya mono oopresenda 1.4, Zambezi oopresenda 1.3, Kavango West 0.4 omanga Kavango East 0.3.

Sho a popi kegandjo lyookota dhoka ooshona noonkondo, Minista Kawana okwa popi kutya omolwaashoka iitopolwa mbyoka oya ningi owala eindilo lyoohi dhomaludhi gamwepo ngaashi dhoka hadhi ithanwa horse mackerel oshowo hake, omanga iitopolwa yimwe ya ningi eindilo lyomaludhi agehe konyala.



Iitopolwa yimwe ngaashi Khomas okwa pewa oopresenda 11, Erongo 9.9, Omusati (5.9), Otjozondjupa (5.8) oshowo Oshikoto (5.5). Kawana okwa tsikile kutya omahangano ga thika pe 125 oga pewa uuthemba wokukwata oohi na oga kalelapo oopresenda 29.

Omahangano gamwe ngoka ga pewa uuthemba wokukwata oohi dhohake ongaashi Tunacor, Hangana Seafood, Diaz Fishing, Omaru Fishing noNovanam.

Ngoka ga pewa uuthemba wokukwata oohi dhohorse mackerel ongaashi Cadilu Fishing, Huab Fishing, Namibia Fishermen Association oshowo Namibia Marine Resources.

Kawana okwa popi kutya shika oshikando shotango mondjokonona iitopolwa ayihe 14, tayi pewa uuthemba wokukwata oohi.