Omulongiskola a tulilwamo iipotha iipe yekengelelo

Omulongiskola a tulilwamo iipotha iipe yekengeleloA tindilwa omboloha Omulongiskola gwomoshitopolwa shaHangwena, Fransina Mwetufa, TUYEIMO HAIDULA



ngoka ta lundililwa oshipotha sheponokelo lyomuniilonga pamwe naye okwa tulilwa mo iipotha iipe yekengelelo.





OSHAKATI

Mwefuta okwa holoka mompangu yaShakati ta tamanekelwa oshipotha kutya okwa landa ohauto yoPolo Vivo a gandja omukanda gwiifundja gwuumbangi womafutilo.

Okwa holoka komeho yamangestrata Helena Ekandjo.

Omupopiliko gwopolisi yaShana Thomas Aiyambo okwa popi kutya Mwetufa okwali woo a kambadhala okulanditha po ohauto ye miineya komulandi gwiihauto, Maree Hendrick Johannes, nokonima yomasiku okwa shuna ko kuye a hala ishewe okulanda po ohauto. Shoka aniwa osha ningwa momasiku 22 gaMaalitsa.

Johannes okwa lombwele oNamibian Sun kutya okwa li a zimine opo Mwetufa a landeko ohauto ndjoka shampa owala tashi ningwa muule womasiku 30.

Okwa popi kutya ohauto ndjoka okwe yi landa ko koN$30 000, na okwa li teyi landitha ishewe kuye koN$37 500.

Johannes okwa popi kutya Mwetufa okwe mu tseythile kutya ota landitha ohauto opo a fute oskola ye.

Okwa tsikile kutya oka tokola okutuma oshimaliwa okuza koombaanga ye yoBank Windhoek okuya koStandard Bank.

“Okwa tuminendje uumbangi womafutilo esiku ndyoka koWhatsApp. Konima yomasiku gatatu oshimaliwa inashi thika na onda yi kombaanga ndika pule na onda lombwelwa kutya uumbangi mboka womafutilo otawu limbililike,” Johannes a popi.

Okwa popi kutya okwe mu pula ihe okwe mu lombwele kutya ota futu niidhidhimike owala.

Konima sho iimaliwa inayi lopota konima yomasiku okwa tseyithile opolisi nokupatulula oshipotha.

Mwetufa okwa tindilwa omboloha noshipotha she osha undulilwa komasiku 19 gaMei nuumvo.

Oombangi pethimbo a holoka mompangu odha lombwele oNamibian Sun kutya, Mwetufa okwa li ta lili ta pula opo a ningilwe omakonaakono gopamadhilaadhilo ihe eindilo lye inali taambiwa. Momaandaha Mwetufa okwa holoka mompanguli yEenhana ta tamanekela oshipotha shonkambadhala yedhipago nokuhinga nuuhasha konima sho a tulwa miipandeko momasiku 25.

Ota tamanekelwa epondo lyomuniilonga pamwe naye oshowo okumu tsa nombele iikando yontumba moshipala nothingo.

Omupopiliko gwOpolisi yaHangwena, Andrew Nghiyolwa okwa popi kutya oshiningwanima osha ningilwa momukunda Ondaanda.

Nakuponokelwa Ndapewa Indongo (24) okwa gandja ehokololo koNamibian Sun kutya Mwetufa okwa li e mu hiya opo ya kalye omwiha opo ya ka popye woo kuupyakadhi we woshimaliwa, nomondjila Mwetufa okwe mu ponokele ta popi kutya ota taandelitha oohapu dhiifundja kombinga ye poskola.

Indongo ota mono epango moshipangelo shopaumwene mOndangwa.