Aalongi ya ningi ekanka Aalongi oya kunkililwa yiihambate nawa pethimbo lyekanka Ekanka lyotango lyopampango lyaalongiskola mondjokonona yaNamibia olya ningwa mOshilongo mEitine nEtitano lyoshiwike sha piti. Aalongiskola mboka ya kutha ombinga mekanka ndyoka lya ningwa pehulilo lyoshiwike sha piti, mOshitopolwa shaShana oya popi kutya epangelo olya li, li wete kutya itaya vulu okuya mekanka ihe ekanka ndyoka olya ningwa.“Epangelo olya dhilaadhila kutya omolwa ombili ndjoka tayi tyapulwa moshilongo, itashi vulika aalongi ya ye mekanka ihe aalongi oye shi ningi. Ope na omupopyo tagu ti kutya ashihe shoka sha pondolwa nena osha li sha talika kutya itashi vulu okuningwa,” gumwe gwomaalongiskola ta ti.
Ekanka ndyoka lya ningwa kaalongiskola olyo lyotango tali ningwa li li pampango mondjokonona yoshilongo.
Oshifokundaneki shika osha li sha talele po ooskola dha yooloka, oshowo omudhingoloko gwedhina Adorfy guli ookilometa dhontumba okuza mOngwediva, moka aalongiskola ya gongala kohi yomuti nokutseyithilwa oompango dhekanka kaakalelipo yehangano lyawo lyoNamibia National Teachers Union (Nantu).
“Ongaashi wu shi wete kutya ekanka ndika olyopambili. Otwa gongala owala opo tu popye kombinga yomaihumbato pethimbo ndika,” omunashipundi gwoNantu gwopashitopolwa Isaih Nanhapo ta ti.
Nonando ekanka okwa hololwa kutya oya ningwa pambili, opolisi oyali ya ithanwa opo yi kuthe ombinga, sho ondjila yopokati kOsekundoskola yaIipumbu nOshakati ya tulwa omainda ngaahsi omamanya.
Sho oshikundaneki shika sha thiki pehala mpoka, opolisi oya popi kutya aanaskola oya li ya ningi omainda ngoka mondjila, na oya fadhukapo sho opolisi ye yapo.
Opolisi natango oya li ya ithanwa sho aalongiskola ya tokola okuninga omunyanyo okuza mOtuzemba okuya pokapale kaOpuwo, hoka kwa li oshituthi shokudhimbuluka esiku tali ithanwa International Day of Disaster Reduction. Oshituthi shoka osha longekidhwa kOmbelewa yomupilima , nOmupeha Prima Netumbo Nandi-Ndaitwah oye ali omupopi poshituthi shoka.
“Ookuume ombili onene mo ku mu tseyithila kutya itatu vulu okuya mekanka molwaashoka otu na omupeha omuprima mondoolopa, na inatu pitikwa oku ya mekanka uuna tu na aaleli yopashigwana moondoolopa dhetu,” Omunashipundi gwoNantu mOshitopolwa shaKunene, Ignatius Kamati, oshowo omunashipundi gwoshitayi shaOpuwo, Opuwo, Urikee Tjazapi ya lombwele aalongi.
Shoka osha geyitha aalongi mboka yamwe ya pula kutya omolwashike aalongi mOvenduka ye li mekanka ngele aaleli yopashigwana ayehe omo yeli moshilando shoka mwa kwatelwa nomupresidende.
Gumwe gwomaalongiskola okwa igitha kutya yakwawo mOutjo otaya ningi ekanka yahena ekwatelo komeho lyopolisi, nayo otaya vulu okushi ninga ngele opolisi inayi hala okuya kwathela.
Omukomeho gwIilonga yOpolisi mOpuwo, Omupeha Komufala Jaron Iita, okwa li a ithanwa pehala mpoka na okwa lombwele aalongi kutya elalakano kali shi okuya moshipala ekanka lyawo ihe uupyakadhi ehala mpoka taya ningile ekanka.
“Pokapale ope na nale oshitudhi tashi ningilwa po onkene itatu vulu okumu fala po, tegeleleni owala ngula opo mu vule okuninga ekanka lyeni,” Iita ta ti.
Inaku lopotwa iimbuluma ya sha naalongi oya tokola okuka gongala pehala li li pondje ya Opuwo. Omukuluntuskola gwoskola yaMureti Senior Secondary School, Tjipueja Gert Wayne Uaavi okwa lombwele oNamibian Sun ye okwa kala poskola molwaashoka oku na okukwashilipaleka kutya iilongitho yomakonaakono nomaliko goskola oga gamenwa.
“Aalongi yaali oya tokola okukala nangame. Otu na aanona yeli momuhandjo naamboka aanaskola yopaumwene ya li ye na okushanga omakonaakono, onkene otu na okuya kondolola,” Uaavi ta ti.
KENYA KAMBOWE & ILENI NANDJATO