Nakusa koCorona gwotango moKavango East a fumbikwa

Nakusa koCorona gwotango moKavango East a fumbikwa KENYA KAMBOWE

RUNDU

Aakwanezimo owala yaali ya kala pefumbiko lyomukokele ngoka a hulitha koCorona moRundu, pefumbiko ndyoka lya ningwa mehuliloshiwike.

Omuniilonga nale mEtanga lyEgameno ngoka a li moshipundi shevululuko okwa fumbikwa pomayendo gaSarasungu moRundu.

Uuyelele mboka wa monika po koNamibian Sun okutya omulumentu ngoka okwa fumbikwa konima yomasiku gahamano sho a hulitha molwaashoka osha monika mo owala lwanima kutya okwa hulitha koCovid-19.

Aakwanezimo owala naanambelelwa yuundjolowele ya pitikwa okuya popepi nomayendo mpoka pwa fumbikwa nakusa omanga iikundaneki ya kunkililwa yi kale kokule neyendo oshinano shoomita 50.

Kakele kaanambelewa yuundjolowele ya zala iikutu yokwiigamena ya li taya endelele okumanitha efumbiko ndyoka, ofamili oya tala nkene ombila yomuholike gwawo tayi filwa nembakumbaku.

Esiikilo lyombila moshito ohali ningwa kaakwanezimo omanga aalilisa taya imbi omaimbilo nokugandja ethindikilo lyopasimaneko kunakusa.

Nakusa okwa thigako omukulukahi gwe naanona yatano ihe kape na ngoka a li po. Nonando nakusa okwa kala moRundu, okwa valelwa nokukokela mOutapi moshitopolwa shaMusati. Otaku popiwa kutya ofamili oya li yahala opo a fumbikwe mOmusati ihe omolwa omilandu dhoCovid-19 shoka inashi vula okuningwa.

Nakusa koCovid-19 ota vulu owala okweendithwa nokufalwa hoka ta ka fumbikwa uuna a hwikwapo.

Ofamili oya nyenyeta woo sho inayi vula okutala oshipala shanakusa ngaashi omudhigululwakalo. Shoka osha hala okutya woo ofamili otayi ka tala owala efumbiko lyanakusa mokavideo hoka ka ningwa kwaamboka ya kalapo pefumbiko.

Gwumwe gwomaakwanezimbo mboka ya kala pefumbiko omumwayinamati omushona gwanakusa ngoka ina vula okuyamukula omapulo ngoka a pulwa kiikundaneki kakele kokuholoka kutya oshikando she shotango okukala moRundu.

Omanga efumbiko ndyoka inali ningwa, Ngoloneya gwoshitopolwa shaKavango East, Bonifatius Wakudumo okwa ningi omutumba gwiikundaneki moka a tseyitha eso lyotango moshitopolwa omolwa oCovid-19 na okwa pula oshigwana shiihumbate nawa nokulandula omalombwelo gekeelelo lyombuto ndjoka.

“Dhidhilika ombuto ndjoka ihayi ende, ihe aantu ha ye yi enditha,” Wakudumo a popi.

Ondoolopa yaRundu oya lopota iipotha 16 yombuto ndjoka.