Aanona taya pewa uusama omolwa omulilo omutilithi

Aanona taya pewa uusama omolwa omulilo omutilithi ILENI NANDJATO

ONDANGWA



Oolopota dhomulilo tagu hanagulapo omagumbo goofamili mbali monooli yoshilongo odha holola omilombo omipe.

Oofamili dhoka mbali odha popi kutya omulilo ogwa hulu konima sho ya kutha mo momagumbo moka aanona yaakadhona yaali. Konima sho oofamili dhoka, yimwe hayi zi momukunda Epandulo popepi nEheke moshitopolwa shaShana oshowo yimwe hayi zi momukunda Oniihandi mOniipa moshitopolwa shaShikoto dha kanitha iinima yawo okuza komililo odha tameke tadhi konaakona.

Oofamili adhihe mbali odha mono aniwa kutya uukadhona mboka uwali kamwe ke na oomvula 1 oshowo okakwawo koomvula 16 oya landulwa komulilo.



Epandulo

Konima sho ofamili yomunamimvo 71 Flavia Erastus ya kanitha omaliko gawo agehe komulilo okutameka Novemba gwomvula ya piti, oya nongele kutya omulilo ngoka ogwa landula okakadhona hoka koomvula 16, oya tokola nduno okukatuma kooyina.

Marina Shoopala okwa popi kutya shoka osho she ya tokolitha okutuma okakadhona hoka kaye.

“Okakadhona hoka oka valwa komumwamememati, na otwa kala nako omanga kali ke na oomvula mbali. Sho omulilo gwa tameke ogwa hwikepo tango ondunda yameme yokulala moka atuhe twa li hatu lala. Ondunda oya pipo ayihe ihe aantu mboka ya li megumbo oye shi pondola okukuthamo iinima yandje yimwe po. Kape na ngoka e shi kutya omulilo ngoka ogwa zi peni.”

“Ondunda ndjoka oya tungululwa nduno niipeleki ihe natango omulilo ngoka ogwa galuka, nokuyi hwikapo. Konima otwa dhidhilike kutya kehe pamwe mpoka tatu tula iinima ye oha pu pi, na osheeta nduno tu fekele kutya omulilo ogwe mu landula. Otwe mu tumu a ye kofamili yameme gwe, ihe omulilo ogwe mu landula ishewe.”

Shoopala okwa popi kutya konima sho ye mu tumu a ye kofamili yameme gwe mOnkumbula moshitopolwa shaShikoto, ina ya mona we omulilo ngoka.

“Omupya omunene otwa yakula oongodhi okuza kofamili ndjoka kutya egumbo lyawo otali pi, na otwa tokola kutya okakadhona hoka itaka galuka we,” Shoopala a popi.

Momukunda Oniihandi omulilo ogwa tameke sho aanona ya za kegumbo lyanakusa Eliaser Kotried ya katalela po kegumbo lyahekulu Jailus France Shikale momasiku 30 gaDesemba omvula ya piti, nondunda yokupungula oya tameke tayi pi. Esiku lya landula omulilo natango ogwa hwikepo oondunda ne dhokulala megumbo lyanakusa Eliaser Kotried.

Konima yesiku limwe natango, omulilo ogwa hwikepo natango oondunda ne dhokulala.

“MuJanuari, egumbo olya pi oondunda uule womasiku gahamano ga landulathana nomuMaalitsa omulilo ogwa shuna ishewe kegumbo lyaShikale, konima sho okakadhona hoka ka katalela po natango. Okuza mpoka otwa fekele kutya omulilo ngoka ogwa landula okanona hoka, na otwe ka tumu kaye koomeme gwako kOnayena. Esiku lya landula otwa tseyithilwa kutya omulilo ogwa hanagulapo egumbo alihe,” omukwanezimo ngoka ina hala uukwatya we wutumbulwe a holola.

Pethimbo ndika sho kwa tegelelwa ooskola dhi tameke oofamili dhoka odha ndjika oonyala mevi kutya uunona mboka itawu galuka we, unene sho wa tumwa kokule nooskola dhawo.