Epwaakeno lyombeila yaMoussongela lya undulilwa komeho 0 Oshipotha shepulakeno lyomboloha yomusita omukwashigwana gwaCongo ngoka e li modholongo ta tamanekelwa iipotha yelanditho lyaantu, ekwato nkonga oshowo omatilitho osha undulilwa komasiku 24 gaKotomba.Pedro Marcelino Moussongela, okuli omutotipo gwongeleka yoEvangelical Mennonite Brethren Church oshowo oskola yoMennonite Brethren Community School Namibia, na okwa holoka mompangulilo yaNdangwa mOmaandaha noshipotha she osha undulilwa komeho omanga ta kala modholongo yaLuno.
Ethimbo ndika oshipotha shepwaakeno lyomboloha ye osha undulilwa komeho molwaashoka omufali gwiihokolola kompangu gwepangelo, Dollen Gowases kali po.
Oshipotha shoka osha undulilwa komasiku 24 gaKotomba noshipotha she otashi ka pulakenwa uule womasiku gatatu.
Moussongela okuli modholongo yaLuno, konima sho Gowases ningi eindilo opo a lundululilwe kodholongo yilwe sho a ali aadhika ta longitha oongodhi omanga e li modholongo.
Okwa popi kutya onkalo ndjoka otashi vulika yi ye moshipala omakonaakono gopolisi. Okwa tindilwa omboloha sho a li a holoka komeho yompangu oshikando shotango mOndangwa molwaashoka okwa li a holoka komeho yoompangu yaVenduka miipotha ya faathana.
Otaku hokololwa kutya okwa longitha edhina lyongeleka noskola ndjoka mokulanditha po AaNamibia mboka yeli mompumbwe kiilongo yaEuropa nokuya ningitha aapika yopamilalo.
Okwa kala mondjeedhililo konima nkene a tulwa miipandeko momasiku 23 gaJuni nuumvo.
Ota pangulilwa iipotha yelanditho lyaantu, ekwatonkonga, omadhengo oshowo eningilo lyaantu omatilitho.
MuJuni natango okwa patululwa iipotha yeyonagulo lyuuthemba womuntu mekwathelo lyoNamRights.
NamRights oya popi kutya nakutulamo oshipotha omunaskola nale muyimwe yomooskola dhaMoussongela.
Okwa li a falwa koTurkey taku tiwa otayi koskola ihe okwe keshi mona owala kutya okwa falwako nongeshefa yopamilalo.
Pethimbo a holoka mompangulilo muMei, okwa uvika kutya Moussongela okwa landitha po aanona ye yatano koEngland na okwa tumu omuntu gwontumba a fale aanona mbyoka koLondon yeli kohi yoomvula 12. Otaku popiwa woo kutya uunona we mboka wumwe okwe wu vala nomonakadhona.