Omakonaakono otaga tsikile-Epangelo 0 Epangelo olya popi kutya omakonaakono gooskola gopashigwana ngoka ga tameke moshilongo otaga tsikile nonando aalongiskola okwa tegelelwa ya ye mekanka.Momukanda gwiikundaneki ngoka gwa pitithwa kepangelo mehuliloshiwike ogwa popi kutya, epangelo olya simaneka uuthemba waaniilonga yawo mbyoka taya kutha ombinga momakanka geli paveta, ihe shampa owala itaku thindilwa pevi uuthemba waanona opo yamone elongo nokushanga omakonaakono gawo pambili.
Omukanda ngoka gwa pitithwa kuamushanga takalele mOmbelewa yOmuprima minister ogwa popi kutya epangelo otali ka kwashilipaleka kutya omakonaakono oga shangwa ngaashi sha pangelwa.
Sha landula sho epangelo nehangano lyaaniilonga lya adha okwena kwa thita moonkundathana dhi na sha noondjambi dhaalongiskola. Omupokati moonkundathana dhoka okwa tokola opo ku gandjwe ethimbo lyomasiku gaheyali nokonima yomasiku ngoka aalongi otaya yi mekanka.
Epangelo olya popi kutya muule womasiku ngoka inaga gwana opo li ninge oompangela dhokufala aaiyambi kooskola opo ya ka taalele omakonaakono.
Kombinga yehala moka tapu kala aalongi mboka taya kutha ombinga mekanka, okwa tokolwa opo aalongiskola ya kale oshinano shoometa 500 okuza poskola,nonando epangelo olya holola kutya oshinano shoka oshishona na otashi vulika shi ka ye moshipala aanaskola pethimbo lyootundi nenge lyomakonaakono.
Molwaashoka omugandji gwiilonga ina pitikwa okukuta miilonga aaniilonga yalwe taya futwa uuna aaniilonga ye li mekanka, epangelo otali ka longitha aayiyambi nonando omukalo ngoka inagu tothwamo mEkotampango lyAaniilonga nepangelo oli li moonkundathana nahahende gwalyo.