Omandiki gaali gokwiikalekela aantu omolwa ocorona mOshikoto

Omandiki gaali gokwiikalekela aantu omolwa ocorona mOshikoto ILENI NANDJATO

ONANDJOKWE

Oshipangelo shOndangwa Private Hospital osha longulula limwe lyomomawalanda ga kulupa moshipangelo shaNandjokwe nokuli ninga endiki lyokwiikalekela aapangwa yoCovid-19 omanga omina yaDundee Precious Metals ya gandja oshimaliwa shoomiliyona ntano shi longithwe momandiki gokwiikalekela aantu moshipangelo shopashitopowa shaTsumeb.

Ondangwa Private Hospital oshowo Selma Rainio Medical Centre mOnandjokwe otaya minikile woo aantu ayehe mboka taya yi miipangelo mbyoka.

Oshilyo shelelo moshipangelo shaNandjokwe, Dr Siraji Saad Rwehumbiza, okwa popi kutya oya li ya limbililwa kombinga yomwaalu omunene gwaapangwa yoCovid-19 na kapwa li ehala moshipangelo oshikulu.

“Oshipangelo shopaumwene shOndangwa Private Hospital osha longulula ewalanda ndyoka lyoombete 12 nokuli ninga endiki lyokwiikalekela.

“Ngele kwa monika oshipotha shoCovid-19 nena otu na ehala lyokutula aantu.

Andola inatu vula okushi ninga kutseyene,” Rwehumbiza a popi.

“Ewalanda oli na omahala gokutula omifudhitho na otatu tala kutya otatu mono peni oventilators, ihe otwa pyakudhukwa.”



Oshikondo shopaumwene sha kwathele

Mwene gwOndangwa Private Hospital, Dr Happy Musweu okwa popi kutya olugodhi okukondjitha ombuto yoCovid-19 olwaantu ayehe naashoka osho sha etitha ya kuthe ombinga.

“Okuza kombinga yetu tse Ondangwa Private Hospital otwa dhilaadhila okukwathela epangelo nomomukalo moka tatu vulu okulwitha ombuto ndjika okukwashilipaleka kutya otu na omahala gokupangela aayakulwa,” Musweu a popi.

Oshipangelo ohashi minikile aantu aayehe mboka taya yi mo naapangwa mbokaa taya ulike omadhidhilio goCovic-19 ohaya ukithwa koshipangelo shaNandjokwe.



Tsumeb okwiipyakidhila

Omukomeho nomupeha presidende gwomina yomoTsumeb, yoDundee Precious Metals, Zebra Kasete okwa popi kutya oomiliyona 5 dhoka ya gandja omagano koshipangelo shopashitopolwa shaTsumeb otadhi ka longithwa mokuyambulapo endiki lyokwiikalekela aapangwa yombuto yocorona.