Aanona 1 200 inaya mona ­omahala ­mondondo ­yotango mOshana

Aanona 1 200 inaya mona ­omahala ­mondondo ­yotango mOshana Ompumbwe yomahala goskola mondoolopa nenge popepi nondoolopa yaShakati, Ondangwa nOngwediva oyi li pombanda unene nokuyeleka nomahala ngoka geli po. Sho ooskola tadhi tameke moshiwike twa taalela, oshikondo shelongo moshitopolwa shaShana osha taalela ompumbwe yomahala geli 1 200 gaanona mboka taya yi mondondo yotango nuumvo.

Konima sho ya yakula omaindilo geli 4 000 oshitopolwa oshe shi pondola owala okumonena omahala aanona ye li po 2 732, nonando ongaaka ooskola odhindji dhomomikunda odhi na omahala.

Omupeha omukomeho gwelongo moshitopolwa, Gerhard Ndafenongo, okwa popi kutya aanona inaya vula ayehe okumona omahala mooskola tadhi adhika mooondoolopa ndhoka ndatu oshowo mooskola dhopoondoolopa dhi li popepi.

Ndafenongo okwa popi kutya omwaalu ngoka ogu li pombanda noshitopolwa itashi vulu okutula aanona mboka mooskola dhomoondolopa ndhoka molwaashoka odha adha nale omiyalu dhawo. Ndafenongo okwa tsikile kutya oya tseyithila aavali opo ya koleke omwaalu gwaanona mboka inaya mona omahala nomoshiwike twa taalela, otaya tala kutya otaya ningi oompangela dhi li ngiini, mwa kwatelwa ootundi dhopaali mesiku, dhoka dhongula nokomatango, nonando ongaaka okwa popi kutya omulandu ngoka ohagu vulu okweetitha pevi epito lyaanona niinyangadhalwa yimwe yoskola ohayi gumwa komulandu ngoka.

Okwa popi kutya ooskola momudhingoloko ngaashi Omaalala, Oikango, Akuna, Omusheshe nadho odha taalela ompumbwe yomahala.

ILENI NANDJATO