Ofakitoli yokulonga iipundi niitaafula yooskola moKavango East

Ofakitoli yokulonga iipundi niitaafula yooskola moKavango East KENYA KAMBOWE

Ehangano lyoMJ Tanko Investments otali ningi oompangela dhokutotapo ofakitoli yokulonga iikwafurniture moRundu, ndjoka tayi ka kala nokupangela iipundi niitaafula yomooskola.

Omukomeho gwehangano ndyoka, Mechitilde Mupiri okwa popi kutya ofakitoli ndjoka otayi ka longela kumwe nehangano li li moJohannesburg moSouth Africa.

Mupiri okwa popi kutya ngele ayihe oya yi pomahala ngaashi taya pangele nena opoloyeka ndjoka otayi tameke iilonga okuya pehulilo lyomvula ndjika.

“Ngashiingeyi otatu ningi owala omitumba mpaka naampeyaka nongele otwa mono oshitopolwa shevi neinekelo kutya kehe shimwe otashi pula komeho ngaashi twa pangela nena otatu tameke iilonga okuya pehulilo lyomvula ndjika,” Mupiri a lombwele oNamibian Sun.



Okwa popi kutya edhilaadhilo ndyoka olya pendulwa kompumbwe yiipundi niitaafula moskola dhomoshitopolwa shoka, tashi etitha aanona ya kuutumbe pevi.

Okwa popi woo kutya oya hwahwamekwa koHarambee Prosperity Plan (HPP), ndjoka tayi tsu omukumo aanyasha ya totepo omadhilaadhilo mokukwathela epangelo megandjo lyomayakulo nomayambidhidho koshigwana.

“Otwa dhidhilike nkene aanona taya kuutumba kondhopi moongulu dhoskola shoka sha puka. Kehe omunaskola okwa pumbwa okukala e na oshipundi oshowo oshitaafula shokunyolela, naashoka osho tatu pangelele okupatulula ofakitoi ndjoka tayi ka gandja iitaafula niipundi kooskola.”

Okwa popi kutya iinima mbyoka taya kondando otayi ka vulika, na otayi ka kuta miilonga aantu yomoshitopolwa nokukwathela meshuno pevi lyomwaalu gwokwaahena iilonga. Oshitopolwa shaKavango East oshi na ondjele yokwaahena iilonga yi li pooresenda 62.5.

“Otu na ondjele yi li pombanda yokwaahena iilonga mokati kaanyasha moshitopolwa oshowo moshilongo nomokutotapo endiki ndyoka otatu ka kuta miilonga aanyasha yakwetu nokukwathela mekandulepo lyomukundu gwokwaahena iilonga.”



Mupiri okwa pula aakuthimbinga ya yoolola ya yambidhidhe oshiyetwapo shawo opo shi vule okwaadha omalalakano, ta popi kutya yimwe lyomoompangela dhuulethimbo dhehangano lyoMJ Tanko Investments, okutuma pondje piilongo yopuushiinda iilongomwa yawo.

Sho a ningwa nale ekwatathano, omukomeho gwelongo moKavango East, Fanuel Kapapero okwa popi kutya ombelewa ye oya taambako opoloyeka ndjoka.





Kapapero okwa holola kutya ompumbwe yiipundi niitaafula mooskola oyi li omukundu omunene sho muule woomvula ndatu dha piti inapu kala iimaliwa yokulandela ooskola iipundi niitaafula.

Okwa popi kutya ndjoka ompangela ombwaanawa na otaya pula ehangano li manithe oompangela dhawo ihe okwa popi kutya omilandu dhokulanda iinima mepangelo otadhi ka longithwa na itashiti kutya otaya ka tameka owala okulanda okuza kehangano lyoMJ Tanko Investments.