Iiponga otayi mana po oshigwana Ekalekepo lyoompamgo moondjila dhaNamibia ogwo owala omukalo ngoka tagu vulu okuya moshipala iiponga yomoondjila mbyoka tayi faalele oomwenyo dhaakwashigwana omayovi oshilongo.Dhoka oohapu dhamushanga gwoNamibia Road Safety Council (NRSC) Eugene Tendekule.
Okwa popi kutya nonando otaku ningwa oonkambadhala kehe kaakalekipo yooveta omukalo gwekondololo lyoompango dhomoondjila kagu li pamuthika gwopombanda moshilongo.
Tendekule okwa popi kutya omakonaakono ngoka ga ningwa oga mona kutya aalongithi yoondjila oye na omauyelele kehe ngoka taya pumbwa mekaleko lyiiponga kokule ihe omaihumbato gaahingi naalongithi yoondjila oga pumbwa okulunduluka.
Okwa popi kutya ngele omaihumbato guuhasha nokushinga nuuhasha mokati kaahingi otaga tsikile nena aahingi onkene taya tsikile nokwiidhimbika oompango dhomoondjila.
Okwa popi kutya aahingi yaNamibia oye na omukalo gwokupogola oompango dhomoondjila nolundji aantu ohaya kala taya hingi ya endelela naashoka otashi etitha aanti ya hinge oondapo oonene noonkondo.
Olopota ya ningwa koGender Research and Advocacy Project (GR&AP) yoLAC, oya mono kutya iiponga oyindji otayi pula opo ku katukwe oonkatu dhelongo lyaalongithi yondjila mekwathelo lyepangelo naakalekipo yoompango.
Rachel Coomer, gwoGR&AP, okwa gwedha ko kutya otwa pumbwa oompango dha gwedha kwaadhoka dhili nale miilonga opo oondjila dhetu dhi kale ehala lya gamenwa.
Olopota yoLAC oya popi woo kombinga yomapaya gokwiimangelamo kaakuluntu naanona kutya otaga hupitha oomwenyo.
Coomer okwa popi kutya molwaashoka omikalo dhilwe ngaashi oompate oombali iinima mbyoka yi na ondilo na otayi kwata ethimbo, ope na shoka tashi vulu okuningwa manga ngaashi okuyambulapo onkalo yuukolele wiihauto moopate dhaayehe.
Mehuliloshiwike lya piti, okwa lopotwa iiponga mbyoka ya faalela oomwenyo dhaantu yahetatu palopota ndjoka ya pitithwa koMVA.
Iiponga mbyoka oya etitha omayehameko gaantu 32 na oya holoka miitopolwa unene shaKhomas, , Otjozondjupa, Hardap, Erongo nOhangwena.
JANA-MARI SMITH