Aayelele ya patwelwa pondje mOhangwena

Aayelele ya patwelwa pondje mOhangwenaOshitopolwa sha yamukula kutya inashi pewa elombwelo lyokushangitha aakwashigwana mboka Nonando omalelo giitopolwa oga lombwelwa opo ga kwatelemo meshangitho lyoprograma yoshikukuta aakwashigwana ayehe naamboka ya kala inaya talika monakuziwa, aakwashigwana yomuhoko gwAayelele moshitopolwa shaHangwena okwa lopotwa kutya inaya shangithwa moprograma ndjoka. Oshitopolwa shaHangwena oshimwe shomiitopolwa yi na omwaalu guli pombanda gwaakwashigwana mboka ya kala inaya talika monakuziwa na otaya lumbu monkalo yoluhepo na oya tongolwa moshitopolwa shoka okuza kaakwashigwana yakwawo.

Omunashipundi gwOhangwena regional council, Erickson Ndawanifa okwa koleke kutya oshitopolwa inashi kwatelamo momashangitho aakwashigwana yomuhoko gwAayelele molwaashoka inaya pewa elombwelo ye shi ninge. Nonando ongaaka itashi tsu kumwe nomapopyo gomunambelewa gwochief regional officer, Fillipus Shilongo, ngoka a popi kutya oya yakula elombwelo kutya aakwashigwana mboka oya kwatelwa mo momiyalu dhomayalulo ngoka ga ningwa kepangelo.

“Inatu mona elombwelo ndyoka tali tu tseyithile opo tu kwatelemo Aayelele meshangitho lyoprograma yoondya dhoshikukuta. Aantu mboka oye na oprograma yawo ndjoka hayi ya pe oondya okupitila mOmbelelwa yOmupeha Presidende, onkene katu na ontseyo ngele oprograma yawo oya kalekwa na otwa pumbwa okuya kwatelamo momashangitho ngoka tatu ningi,” Ndawanifa a popi.

Epangelo olya ningi etseyitho kutya aanamangumbo mboka ye na iiyemo ya tulwa kumwe ya thika pooN$2 600 itaya mono omayambidhidho goondya dhoshikukuta na omwa kwatelwa aaniilonga mboka haya mono oondjambi dhi li pevi.

Momasiku 10 gaMei, Ombelelwa yOmuprima oya gandja elombwelo koombelewa dhomalelo giitopolwa opo dhi shangithe aantu mboka taya pewa oondya dhoshikukuta na odha pewa sigo omasiku 16 gaMei opo ya kale ya gandja omadhina ngoka. Eshangitho ndyoka otali ningwa kooyene yomikunda oshowo kookomitiye dhoshikukuta dhoka dha totwa po momikunda.

Ndawanifa okwa popi kutya sho ya pewa elombwelo kOmbelewa yOmuprima kaya li taya vulu okugandja omiyalu dhomondjila muule woshiwike shimwe,onkene oya pula opo ya pewe sigo omasiku 24 gaMei.

Okwa popi kutya oya pula opo ya gwedhelwe omasiku molwaashoka andola inaya vula okugandja omauyelele gomondjila.

Shilongo okwa popi kutya elelepeko lyomasiku gokushangithwa olya ningwa opo omashangitho ga kwatelemo aantu ayehe mboka ya pumbwa okushangithwa.

“Moshitopolwa shaHangwena katu na omukundu gwasha naantu mboka ya kala inaya talika nale molwaashoka oya kwatelwamo moprograma yoshikukuta ngaashi owala aantu ayehe. Oshili kutya elombwelo olye ya lya lata na otwa pula egwedhelo lyomasiku opo tu kwashilipaleke kutya aantu ayehe oya kwatelwa mo,” Shilongo a popi.

“Nonando inaya shangithwa miikandjohogololo yawo, otu na nale omiyalu dhawo moompangela dhomayambulepo onkene inaku pumbiwa opo ya ka shangwe.”

Oshitopolwa shaShikoto oshowo Oshana oya popi kutya oya shangitha nale aakwashigwana yomuhoko ngoka nonando inaya mona elombwelo kutya nayo otaya shangithwa nenge itaya shangithwa.

Oshifokundaneki shoNamibian Sun inashi vula okumona Omupeha omukomeho ngoka e na oshinakugwanithwa shaakwashigwana mboka ya kala inaya talika nale monakuziwa, Gerson Kamatuka.

Nonando ongaaka omunambelewa gwoompangela dhomayambulepo, Tomas Puleinge, okwa popi kutya omashangitho otaga kwatelemo aantu ayehe pwaahena ondjoolola yuukwatya wawo.

“Aantu mbyoka kaye shi yombelewa yomupevi presidende ihe aakalimo yomiikandjohololo mbyoka. Oya pumbwa okutalika ko ngaashi aantu ayehe,” Puleinge a popi.

Okabinete oka tseyitha oshimaliwa sha thika poomiliyona 572.7kutya osha pumbiwa moprograma yokutopolela oshigwana ondya, omolwa onklao yoshikukuta ndjoka ya taalela oshigwana.

ILENI NANDJATO