AaNamibia ya kwatwa nuuwe

AaNamibia ya kwatwa nuuwe Aakwashigwana yaali Aanamibia oya tulwa miipandeko moSouth Afrika mehuliloshiwike lya piti, sho ya adhika ye na uuwe inawu tetwa wongushu yoomiliyona 1.5.

Oya tumbulwa komadhina kutya Mesias Amweenye (46) oshowo Demetrius Ngenokesho (53) na oya holoka mompangulilo yamangetrata gwaBellville moCape Town mOmaandaha noshipotha shawo osha undulilwa komasiku 27 gaMei.

Aalumentu mboka yaali oya tulwa miipandeko kopolisi yaWestern Cape pethimbo lyeinda lyokuthikameka iihauto nokuhadha ndyoka lya ningwa.Palopota ya pitithwa koSouth African Police Service (Saps) iilyo yoWestern Cape Flying Squad oya li yiipyakidhila nokuthikameka iiyenditho nokuyihadha mondjila yaVoortrekker moBellville omutenya gwEtitano.

Oya holola kutya sho ya thikameke nokupula aalumentu mboka oya monika yatila naashoka osha etitha opolisi yi ya hadhe.

Aalumentu oya adhika nuushako uushona wuna uuwe wuli po 27.

Omakonaakono kutya uuwe mboka owa zi peni otaga ningwa naamboka oya holola kutya otaya kalelwa po koohahende dhopaumwene.

ELLANIE SMIT