Ofamili yuuvithwa nayi kefumbiko lyaali pasimaneko

Ofamili yuuvithwa nayi kefumbiko lyaali pasimanekoIizemo oya holola kutya ina hulitha komukithi ngoka Ofamili yomunamimvo 78 omulumentu ngoka kwa li kwa fekelwa kutya okwa hulitha kombuto yoCongo fever, oya ningi oshituthidhimbuluko shanakusa gwawo pegumbo lye momukunda Onethika B popepi nOntananga moshitopolwa shaShikoto. ILENI NANDJATO

Elifa Kuyewa Iita Shiindi okwa hulitha momasiku 7 Mei, konima sho a thiki poshipangelo shOndandjokwe Lutheran Hospital. Okwa fumbikwa konima yethimbo meendelelo momayendo gaNiitewa.

Iizemo yomakonaakono ngoka ga ningwa okutala ngele oku na ombuto yoCrimean-Congo haemorrhagic fever (CCHF)oya holola kutya kali e na omukithi ngoka, sha landula omakonaakono ngoka ga ningwa koNational Institute for Communicable Diseases (NICD) moSouth Africa.

Ofamili ye naakwashigwana yamwe oya popi kutya oya li ya haluthwa konkundana yeso lye nefumbiko lye esiku lya faathana.

Omuselekadhi gwanakusa, Johanna okwa popi kutya omusamane gwe okwa tameke ta nyenyeta kutya ota ehama montulo momasiku ga7 gaMei.

“Konima okwa gomboka noonkondo na okwa tameke ta zi ombinzi sho ta kokola. Otwa tokola oku mu fala koshipangelo shaNandjkokwe naasho twa thiki poshipangelo okwa hulitha. Konima onda lombwele oondohotola kutya okwa li ta ehama shike, na oya lombwelendje kutya otaya fekele kutya okwa si komukithi omudhipagi na okwa pumbwa okufumbikwa pethimbo ndyoka.”

“Osha li oshidhigu okutaaambako ihe omolwa uumbanda otwa ningi ngaashi aanambelewa yuunamiti ya lombwelendje. Ngame pamwe naatekulu yandje yamwe otwa ningi omasiku mewalanda lyiikalekelwa moshipangelo tatu konaakonwa. Osha li ethimbo edhigu monkalamwenyo yandje molwaashoka inandi vula okuningila omusamane gwandje efumbiko lyopauntu,” omuselekadhi a popi.



Metitano lya piti, ofamili oya ningi oshituthi shokudhimbuluka nakusa nayamwe oya yi komayendo nokutulamo oongala kombila yanakusa.

Sho a popi pethimbo lyoshituthi shoka sha ningwa, Johannes Mbulu okwa popi kutya okwa li a haluthwa konkundana yeso lyaShiindi oshowo efumbiko lye.

“Osha li lwopotundi onti:11, onda li tandi ende okuza komidhingoloko dhuulithilo, tandi longitha ondjila ndjoka ya enda pegumbo lyaShiindi. Onda a dha a kutumba pontu yegumbo lye a kundukidhwa kaatekulu oshowo omukulukandi gwe. Sho nda thikama okwa lombwelendje kutya kuuvite nawa na ota kongo olefa yoku mu fala moshipangelo. Omupya omunene onda li owala tandi yi kegumbo, onkene onde mu faalele sigo opuundingosho opo shi mu ningile oshipu okumona olefa. Konima onda uvu kutya Shiindi okwa hulitha na okwa fumbikwa nale. Kanda li ndiitaala molwaashoka oshinima opo tandi shi uvu lyotango.”



Frans Iimene okwa popi kutya okwa gandja olefa kuShiindi oshowo omukuladhi gwe, noku ya fala koshipangelo.

“Sho twa thiki poshipangelo onde ya helula owala na onda yi kOndangwa. Konima yethimbo onda mono etumwalaka kutya okwa hulitha. Onda thikama e ta ndi dhenge ongodhi. Sho nda dhengele meme Johanna okwa lombwelendje kutya oyiipyakidhila nokulongekidha efumbiko na ota dhengelendje nale. Osha li oshidhigu okuuvako,” Iimene a popi.