Irimari taka tala keyambulepo lyaanyasha oshitopolwa she

Irimari taka tala keyambulepo lyaanyasha oshitopolwa she Ngoloneya omupe gwoshitopolwa shaShana, Elia Irimari, okwa popi kutya okwiitulamo mokulongela oshigwana shaNamibia omanga taka longa nuudhiginini meyambulepo lyeliko, ekwato nawa lyomidhingoloko, oompangela dhomidhingoloko moshitopolwa, eyambulepo lyaanyasha nuuntu oshowo lyomithigululwakalo, neliko lyuunamapya.

Irimari okwa pula eyambidhidho okuza kookansela ayehe moshitopolwa she opo ya vule okuyambulapo eliko lyoshitopolwa nokugandja emanguluko lyopaliko kaakalimo.

Ngoloneya okwa popi ngaaka pethimbo lyomutumba gwotango ngoka a ningi nookansela moshitopolwa oshowo elelo lyoshitopolwa, ta popi kutya okwa hala okunkondopeka elongelokumwe lyepangelo nomahangano gopaumwene ndyoka lya nuninwa okuyambulapo aanangeshefa aashona naamboka yopokati.

Kansela nale gwoshikandjohogololo shaNdangwa Urban okwa tseyithile aaniilonga pamwe naye nale kutya ombelewa yaNgoloneya oyiikalekela oshimaliwa sha thika pooN$550 000 shoka sha nuninwa oprograma yoenterprises development moshitopolwa.

Okwa popi kutya iikandjohogololo ayihe moshitopolwa otayi ka pewa oshimaliwa sha thika pooN$50 000 shoka sha nuninwa oprograma ndjoka.

Omwedhi gwapiti, Omupresidende, Hage Geingob okwa ulike, Irimari, ngoka e li omulongiskola keithano opo a ninge ngoloneya gwoshitopowa shaShana, ta pingenepo ngoloneya nale Clemens Kashuupulwa, ngoka uulikwa a ninge omukalelipo gwaNamibia koRussian Federation.

Okwa popi kutya oshitopolwa osha taalela omikundu odhindji ngaashi okwaahena iilonga unene mokati kaanyasha, oluhepo ndoka italu hulu, omwaka pokati kaathigona naakengeli, okwaahathike pamwe paliko oshowo ekoko lyeliko tali ende kashona.



ILENI NANDJATO