Oshikumungu shaHelao Nafidi otashi yi kompangu Aanambelewa yongundu yoSwapo pamwe noElectoral Commission of Namibia (ECN) otaya ka taalela mOmpangu yoPombanda kansela nale mondoolopa Helao Nafidi, Ester Ndatala Nghidimbwa.Shika osha holoka sho ongundu tayi pangele ya ndopa okulandula elombwelo lyomukalelipo gwopaveta gwaNghidimbwa, Henry Shimutwikeni, opo ya talulule etokolo lyawo okukutha mo Nghidimbwa melelo lyondoolopa. Oshipotha shoka otashi pulakenwa momasiku ga 6 gaSeptemba. Oombapila dhompangu otadhi ulike kutya Nghidimbwa okwa hala oonakufalwa kompangu ya pangulilwe etokolo lye okumukutha miilonga.
Oonakufalwa kompangu Ongundu yoSwapo, amushanga gwoSwapo Nangolo Mbumba, elelo lyoHelao Nafidi town , mayola gwoHelao Nafidi Eliaser Nghipangelwa, Lucia Nghililewanga oshowo ECN .
Shimutwikeni okwa koleke kutya oshikumungu shoka otashi ka pulakenwa mompangu.
Oshikumungu shoka osha tameke momasiku ga 4 gaDesemba omvula 2015 shoNghidimbwa a ganithilwa miilonga onga kansela pehala lyaNghililewanga sha landula omahogololo gelelo lyiitopolwa noondoolopa.
Nghidimbwa kali okandindate momahogololo gelelo lyaHelao Nafidi ihe okwa li okandindate momahogololo moshikandjo shaShikango.
Nghililewanga okwa nyenyeta na okwa pula ongundu yaSwapo kutya omolwashike a pingenwapo. Etompelo ndyoka a pewa opo aniwa ku topolwe shi thike pamwe iipundi mbyoka ya sindanwa po kuSwapo miikandjo itatu, etokolo ndyoka lya ningwa ponkatu yopashitopolwa.
Swapo okwa sindana iipundi ihamano moHelao Nafidi. Itatu oyookansela yaza moshikandjo shaHangwena, omanga Oshikango mwaza omukalelipo gumwe niiyali oya za moshikandjo shEngela. Nghidimbwa okwa kuthwa opo a ninge omukalelipo omutiyali gwaShikango nokupingenapo Nghilililewanga ngoka a li ponomola ontiyali momusholondondo gwongundu. Opo ku yelekwe epuko ndyoka lya ningwa, momasiku 27 gaJuli elelo lyoSwapo olya kambadhala okukutha miilonga kansela Panduleni Hainghumbi opo ku monike ehala lyaNghililewanga, ihe etokolo olya kalekwa konima sho iikundaneki ya lopota etokolo ndyoka.
Mombapila yomasiku 4 gaAguste, Mbumba okwa popi kutya okwa mono kutya Nghidimbwa okwa li okandindate komoshikandjo shaShikango ihe hamelelo lyaHelao Nafidi onkene otashi kala owala mondjila uuna a kuthwa miilonga onga kansela opo Nghililewanga a ganithilwe miilonga.
Mbumba okwa tindi okupopya kombinga yoshipotha shompangu.
KENYA KAMBOWE