NSFAF itaka shunithila we aailongi iimaliwa

NSFAF itaka shunithila we aailongi iimaliwa Aailongi mboka taya pewa omakwatho gokwiilonga koshiketha shoNamibia Students Financial Assistance Fund (NSFAF) otaya ka kala nokufuta ko oshitopolwa shimwe shomailongo gawo konima yomvula yotango momailongo gawo, onga oompangela tadhi tulwa miilonga kepangelo mokukandula po uupyakadhi pokati kaailongi noshiketha shoNSFAF.

Uuministeli welongo lyopombanda owa tokola okukutha po eshunithilo lyiimaliwa kaailongo mboka.

Minista Itah Kandjii-Murangi, omanga ta popitha aailongi yomiiputudhilo yopombanda ya thika po 300 mboka ya ningi ehololomadhilaadhilo pombelewa dhuuministeli welongo lyopombanda mEtitatu, okwa popi kutya ngoka omukalo gwa nuninwa okukandula po uupyakadhi, ta popi kutya iimaliwa mbyoka tayi hupuko uuna NSFAF a futile aailongi mboka omailongo gawo, otayi ka longithwa mokufuta omailongo gaailongi yalwe, na itayi ka pewa we aailongi mboka ngaashi sha kala nokuningwa monakuziwa.

“Itatu tsikile we nokufuta omailongo okuudha gaailongi mboka taya tsikile, shapo ongele aailongi mboka yahala owala oyo ya kale taya pewa iimaliwa nokukaleka omailongo ga yakwawo yawe mboka opo taya tameke.”

Aailongi okuza miiputudhilo ngaashi University of Namibia (Unam), Namibia University of Science and Technology (Nust) oshowo International University of Management (IUM) otaya pula opo etsokumwe ndyoka lya shainwa koNSFAF naailongi momvula yo 2015 ndyoka tali utha iifuta yoopresenda 100 yomailongo gawo oshowo iifuta yoopresenda 80 yaambyoka tayi shi yomailongo opo li tullwe miilonga.

Pahapu dhaailongi mboka, momukandanyenyeto gwawo gwa leshwa pehala lyawo komupeha presidende gwoNamibia National Students Organisation (Nanso), Bernard Kavau, okondalaka ndjoka ompe otayi yi moshipala okondalaka ndjoka ya shainwa mo 2015. Shoka osha hala okutya aailongi otaya ka pumbw o kugwedha kiifuta yomailongo gawo omwaalu gwontumba komwaalu ngoka gu li pooN$17 000.

“Oshimaliwa shoka shooN$17 000 inashi gwana noyendji yomutse itatu ka vula okugwanitha omwaalu ngoka tatu pumbiwa tu gwedhepo tseyene opo tu vule okufuta omailongo getu. Shoka otashi keetitha yamwe ya kale itaya vulu okushanga omakonaakono nenge yamone iizemo yawo,” aailongi ya popi.

Oya popi kutya okondalaka ndjoka ompe oya pumbwa okukuthwa miilonga, nongele inashi ningwa nena minista niikuthe miilonga mbala.

Kandjii-Murangi okwa tseyithile aaiilongi kutya NSFAF okwa longa nokugwanitha po euvaneko lye lyokufutila aailongi omailongo gawo,nonando ope na aailongi yamwe taya iyadha monkalo tayi ya pula opo yagwedhe komwaalu ngoka ya futilwa omolwa omayooloko miikondo yomailongo gawo.

Minista okwa pula aailongi ya taambeko nokutala konkalo ndjoka yi li po ngaashingeeyi yo taya kwathele mokutsakaneka epangelo ondjilakati. Nonando ongaaka aailongi oya popi kutya otaya ka tsikila nehololomadhilaadhilo lyawo poombelewa ndhoka, sigo okoondalaka ndjoka ompe ya ningwa po nenge ku longithwe ndjoka onkulu ya shainwa nale



NAMPA