Hulitheni po okumina evi shaaheli paveta-Nghitila

Hulitheni po okumina evi shaaheli paveta-Nghitila Komufala gwomidhingoloko, Theofilus Nghitila okwa pula ehulithepo lyemino lyevi ndyoka kwa lopotwa lya lundalala noonkondo unene melelo lyoshilongo shUukwambi. Omwedhi gwa piti oshifokundaneki shoNamibian Sun, osha pititha iinyolwa kombinga yemino lyevi lyaali paveta unene monooli yoshilongo moka omahangano taga kutha evi pwaahena iifuta yasha nenge taya futu okamaliwa okashona komalelo gopamuthigululwakalo nokukalanditha evi ndyoka kaatungi nokwiimonena omwaalu omunene gwiiyemo okuza melanditho lyevi.

Paveta kehe ngoka ta mini evi lyopangeshefa okwa pumbwa okumona okukandapitiko tagu ithanwa 'clearance certificate', ihe omahangano ogendji ngoka taga mini evi kage na omukanda ngoka.

Nghitila okwa ningi omutumba nelelo lyUukwambi nokuli lombwela kutya emino lyevi ndyoka tali ningwa melelo lyawo kali li paveta, na okwe ya yelithile nkene omukanda ngoka gwepitiko lyokumina evi hagu vulu okumonika.

Komufala okwa tseyithile elelo ndyoka kombinga yompango yekwato nawa lyomidhingoloko ndjoka tayi ithanwa Environmental Management Act, ndjoka ya popi kutya emino lyevi nomatompelo gongeshefa shaaheli paveta oshi li oshimbuluma.

Okwa tsikile kutya uuministeli womidhingoloko owa pula omukomeho gwopolisi yaNamibia, opo a tseyithie ookomanda dhiitopolwa mokukwathela opo ku hulithwepo emino lyevi shaaheli paveta.

Mboka taya ka monika ondjo moshipotha shoka otaya vulu okufutithwa oshimaliwa shooN$500 000 nenge ya kale modholongo oomvula 25.

Nghitila okwa yelitha kutya kaye li ompinge nomayambulepo ihe oya hala okukalekapo ompango ndjoka tayi gamenene po omidhongoloko. Okwa tsikile kutya ngele aakwashigwana otaya tsikile nokupitika aantu ya mine evi okuza momapya gawo nena shoka otashi ya etele oluhepo.

“Ngele owa gandja po epya lyoye koshimaliwa shooN$300 komuntu opo a mine evi okuza mepya yoye, nongela owala kutya oshimaliwa shoka otashi pupo mbala ihe ngoye oto thigwa po owala nomalambo ge li mepya lyoye. Shoka otashi ti kutya oto thigilwa po epya eshona ndyoka tali vulu okulongwa naashoka otashi etele ofamili yoye oluhepo,” Nghitila a kumagidha.



KENYA KAMBOWE