Uuministeli womidhingoloko wa yelitha

Uuministeli womidhingoloko wa yelitha Otaku ka ningwa tango omakonaaakono kUuministeli wOmidhingoloko uuna omuntu a dhipagwa koshiyamakuti, opo ku monike ngele inaku longwa uuhasha wontumba. Shoka oshimwe shomiipumbiwa momulandu omupe gwoNational Human Wildlife Conflict Policy, ngoka gwa tseyithwa kuyele mOmutumba gwoPashigwana.

Uuministeli owa yelitha shoka inashi uvikako nawa na osha kuthwa ko kutya uuministeli itawu ka futa aantu mboka ya dhipagwa koongandu oshowo oondjambameya.

Euveko ndyoka olya holoka, sha landula oshipopiwa shaMinista Pohamba Shifeta, pethimbo kwa patululwa oMaurus Nekaro Conservancy moKavango West Region.

Shifeta kwa popi kutya ngele aantu oya dhipagwa koongandu noondjambameya onga oshizemo shuuhasha, nena oofamili dhawo itadhi ka futwa oshimaliwa shooN$100 000, shoka sha nuninwa omayambidhidho gefumbiko.

Omunambelewa omupopiliko guuministeli mboka, Romeo Muyunda, okwa popi kutya shoka itashi ti kutya itaku ka gandjwa iifuta ngele omuntu a dhipagwa kongandu nenge kondjambameya.

Okwa yelitha kutya miipotha yiIi ngaaka, omakonaakono otaga ka kala shimwe shomiipumbiwa.

Okwa popi kutya shoka otashi ningwa onga omukalo gwokukunkilila aakwashigwana, molwaashoka oya hala egameno lyoomwenyo, okuza kiiningwanima yoludhi ndoka.

Muyunda okwa popi kutya uuministeli owa limbililwa kondjele yomwaalu gwaantu mboka taya kanitha oomwenyo dhawo onga oshizemo shomaponokelo ga ningwa koongandu, koondjambameya oshowo kiiyamakuti yilwe.

Okwa indile oshigwana shi hulithepo omikalo niilonga mbyoka tayi tulitha moshiponga oomwenyo dhawo kiiyamakuti niilikami.

Muyunda okwa popi kutya iinima ngaashi okuyoga momilonga nenge okuwapalekela iikutu pomilonga, osha nika oshiponga na otashi vulu okuyandwa.