Kape na ehala lyaamboka ya ndopa Oshiingilisa

Kape na ehala lyaamboka ya ndopa Oshiingilisa Iizemo yondondo onti 12 yoNamibian College of Open Learning (Namcol) inayi holola iizemo tayi shambula. Oopresenda owala 10 dhaailongi moshiputudhilo shoka dha piti elaka lyOshiingilisa onga elaka etiyali , nokuthiga aailongi 18 000 ya pumbwa natango okweendulula oshilongwa shoka, ngele oya hala okuyambulapo natango iitsa yawo moshilongwa shoka. Ngele aalongwa ya thika 12 000 mboka ya pumbwa okweendulula oshilongwa shelaka lyOshiingilisa oya gwedhwa komwaalu ngoka nena otashi e ta aailongi ya thika 30 000, ya kale kaye nampoka taya vulu okwiishangitha.

Aailongi ya thika po 12 000 otaya ka thigwa pomutenya shoNamcol ta vulu owala okukala naailongi aape yoshilongwa shelaka lyOshiingilisa ya thika po 18 000. Uuyelele mboka oya hololwa oshiwike sha piti, sho Namcol a tseyitha iizemo ye yopashigwanana yondondo onti 10 no 12 yomvula yo 2017.Pahapu dhomukomeho gwoNamcol, Heroldt Murangi, elaka lyOshiingilisa onga elaka etiyali olya ninga omukundu omunene mokati kaanaskola, anaailongi 20 333 yondondo onti 12 oya li yiishangitha okweendulula oshilongwa shoka, ihe oopresenda owala 10 yeshi pondola okumona ondondo D nenge yi li hwepo.

“Pakutala kiizemo otashi ulike kutya aanaskola 12 000 yomiipundi oshowo aailongi 18 000 yopaumwene, ineyi shi pondola okumona ondondo D nenge yi li hwepo opo ya vule okutaambelwa miiputudhilo yopombanda,” Murangi a popi. Okwa tsikile kutya omwaalu gwaailongi mboka monena otaya ka konga ompito dhookwiishangitha noNamcol mo 2018 opo ya yambulepo iitsa yawo. Aailongi 30 000 otaya ka pumbwa okwiishangitha noNamcol opo ya yambukepo iitsa yawo, omanga oshiputudhilo shoka tashi vulu owala okutambula aailongi 18 000 nuumvo. Aailongi ye li o 41 225, yondondo onti 10 no 12 oyiishangitha noshiputudhilo shoka omvula ya piti.

Omunambelewa ngoka okwa popi kutya, oopresenda 95 dhaailongi yondondo onti 10 no 12 yopaumwene odhaailongi moshiputudhilo shoNamcol, niizemo yawo yondondo onti 10 mo 2017 oya hwepopala , okuyeleka niizemo yo 2016.

Aailongi yondondo onti 10 oyendji oya mono ondondo ngaashi A,B, F no G, omanga aashona yamono ondondo C.

Murangi okwa popi kutya mboka owu li uupyakadhi unene sho ondondo C ya gu pevi oshowo ondondo D omanga ondondo dhopevi lela ndhoka ihadhi yalulwa dha londo pombanda okuza poopresenda 6.8 mo 2016, okuya poopresenda 10.8 2017. Murangi okwa tsikile kutya uupyakadhi wumwe natango omwaalu gwaamboka inaya shanga omakonaakono nonando oyali yiishangitha noshiputudhilo. Okwa popi kutya mboka inaya shanga ekonaakono oyeli 4 398 (15.5%) . Mekonaakono lyondondo 12 iizemo oya hwepopala moondondo (A* to G) okuyeleka niizemo yomomvula yo 2017. Aailongi oye shi enditha nawa momakonakono giilongwa yomalaka gaavalelwa mo sho oyendji ya mono ondondo D nenge yopombanda. Omailongo sha landula omaishangitho gaailongi ya thika po 10 000 miilongwa ya yooloka, inaga manithwa unene mondondo onti 12. Murangi okwa popi kutya shoka otashi vulu okweetithwa omatompelo ga yooloka ngaashi aailongi ya mono pamwe oompito dhiilonga, aailongi yali owala yiishangitha opo ya mone omayakulo galwe gopankalathano ngaashi oopenzela, oshowo aailongi mboka taya ishangitha owala opo ya vule okukala kooskema dhaavali yaawo dhuuwanawa wuunamiti. Murangi okwa popi kutya omukalo ngoka otagu gumu nayi iizemo yomiiputudhilo noshiputudhilo shawo otashi ningi omapekaapeko opo shi tale kutya omatompelo geni po lela haga etitha aailongi ya hulile ondjilakati momailongo gawo uuna taya yambulapo iitsa yawo. Namcol ota pangele okulongela kumwe niiputudhilo ngaashi Government Institutions Pension Fund (GIPF) oshowo ooskema dhuuwanawa wopaunamiti, opo ya tale nkene ye na okuthitika omwaka ngoka tagu etitha omukundu ngoka.