Mugabe a zi koshipundi

Mugabe a zi koshipundi Mugabe okwa kala omupresidende gwaZimbabwe okutameka mo1980.

Opaliamende yaZimbabwe oya tseyitha e zo koshipundi lyomupresidende gwoshilongo shoka, omunamimvo 93 Robert Mugabe. Robert Mugabe okwa zi koshipundi onga omupresidende gwaZimbambwe mEtiyali.

Shoka osha teyithwa komupopi mopaliamende ya Zimbabwe, Jacob Mudenda. E zo koshipundi lyaMugabe olya e ta pehulilo elelo lye luule woomvula 37. Mugabe okwa kuthwa oonkondo dhelelo konima sho aakwiita yoshilongo shoka ya kuthako elelo koonkondo.

“Ngame Robert Gabriel Mugabe ngaashi tashi uthwa kontopolwa onti 96 yEkotampango lyaZimbabwe otandi tseyitha e zo lyandje koshipundi meendeleleo,” Mudenda a popi, pethimbo a lesha omukanda ngoka gwa shangwa kuMugabe. Onkundana ndjoka oya taambiwako nenyanyu enene mopaliamende yaZimbambwe oshowo momapandanda goshilongo shoka unene moshilandopangelo Harare, sho omuleli ngoka a kala koshipundi okutameka omvula yo1980.

Omasiku ga piti, aakwashigwana yaZimbabwe omayovi oya yi momapandanda taya ningi ehololomadhilaadhilo taya pula opo omunamimvo 93 a ze koshipundi ihe Mugabe ngoka a lele oshilongo ina kondjithwa konima nkene oshilongo shoka sha mono emanguuko lyasho okuza kuBritain okwa li a tindi.

Oonkambadhala dhaMugabe dhokuninga omukulukadhi gwe Grace Mugabe omulanduli gwe, odho dha e ta aakwiita yoshilongo shoka ya kutheko elelo lyoshilongo koonkondo.



NAMPA/AFP