Ekandjo a thindikilwa kegumbo lye lyahugunina

Ekandjo a thindikilwa kegumbo lye lyahuguninaEkandjo a tumbalekwa kutya okwa li omuhanganithi Aalilisa omathele oya kala poshituthifumbiko shaKomufala e li moshipundi shevululuko gwopolisi yaNamibia, Joseph Ekandjo, ndyoka lya ningwa mehuliloshiwike. Aalilisa ya za koombinga noombinga oya gongala mOmukunda Ekolyanaambo moshitopolwa shaShana, popepi nOngwediva, opo ya gandje esimaneko lyawo lyahugunina kuKomufala e li moshipundi shevululuko Joseph Shuudifonya Ekandjo, ngoka a hulitha mepupi lyoomvula 62.

Ekandjo okwa li gumwe gwomongundu yaakwiita yoPlan, mboka ya hogololwa kuSwapo, momvula yo-1981 opo ya ka pewe omadheulo gopolisi moMoshi, Dar es Salaam shaTanzania mo 1983, omanga e li muupongekwa, nelalakano okuya longekidhila etotepo lyoshikondo shopolisi shaNamibia, uuna oshilongo sha manguluka. Epangelo olya pe Ekandjo, efumbiko lyopapangelo, na okwa hokololwa koyendji kutya okwa li omuhanganithi gwaantu, omulumentu e na omashendjo ogendji, nomunambili. Opolisi oya popi kutya otaya kala nokumudhimbuluka aluhe onga omulumentu ngoka a gandja onkalamwenyo ye ayihe koshikondo shaakwiita oshowo shopolisi.

Mayola-Ndjai Des Shilunga oye a lesha etumwalaka lyomahekeleko okuza kOmukomeho gwOpolisi, Sebastian Ndeitunga. Shilunga okwa lombwele aalilisa kutya okwali mongundu yaahogololwa mboka ya kapewa omadheulo pamwe naEkandjo moTanzania moomvula dho-1980.

Okwa popi kutya nakusa okwa gwanitha po iilonga ye mbyoka a longo nondjungu nomukumo. Shilunga okwa tsikile kutya nakusa okwa ulikwa nokuninga inspector metanga lyopolisi mo-1990 na okwali e na oshinakugwanithwa shokutula aakwiita yoPlan metanga lyopolisi. MuJuli gwomvula oyo yuundjoka, okwa yelwa nokupewa ombandi yuuChief inspector. Okwa yi moshipundi shevululuko mo-2015.

Mondjokonona ye ndjoka ya leshwa kuAndrew Hashiyana, okwa popi kutya Ekandjo okwa valelwa momukunda Oikango popepi nOngwediva na omo a kokela momukunda ngoka. Mo-1977 pamwe nakuume ke Gideon Nuuyoma Amakali, oya wayimine ekondjelo lyemanguluko lyoshilongo muupongekwa moAngola. Oya kutha ombinga momalugodhi ogendji ngaashi moChippa nomoCalueque. Ekandjo okwa kala a tseyika nawa nedhina lye Iikombo ya Pumako.

Ekandjo okwa hulitha momasiku 16 gaSepetemba mOvenduka, nofamili ye olya lopota kutya okwa tameke ta nyenyeta kutya ota ehama mepunda na okwa yi komundohotola gwe mOshakati na okwa ukithwa mOshipangelo shaNandjokwe, opo a kaningilwe omakonaakono gopaunamiti.

MoNandjokwe okwa ningilwa etando na okwa monika okankera yokehuli. Konima okwa lundululilwa mOvenduka ihe onkalo ye oya nayipala sigo osho a hulitha momasiku 16 gaSepetemba.

Okwa dhigako omukulukadhi gwe Cornelia Pashukeni Ekandjo, yina Peneyambeko Muukenga Namashana, aamwayina yahetatu, oshowo oyana 23 naatekulu 12.

Pethimbo sho a longeke oshikondo shopolisi, okwa pewa iinaakugwanithwa oyindji ya yooloka ngaashi okukwatela komeho iilonga yopolisi moshitopolwa shaCaprivi konima yoshiponokela shuukulo shoka sha ndopa muAguste gwo1999. MuJuli gwo 2004 okwa kwatele komeho oshikondo shoadministration and logistics moSpecial Field Force okutameka muDesemba gwo2005 sigo oMei gwo2010, Ekandjo okwa li a ulikwa onga omukomeho gwotango gwoSADC Police Component at the Planning Element of the SADC Standby Force, a kalelepo oshitopolwa shaSADC, moSADC Secretariat moGaborone, Botswana.

Mokati kaamboka ya kala pefumbiko lye, ongaashi omupeha minista gwOshikondo shOpolisi, Daniel Kashikola, omupeha minista gwIikwamina nIikwankondo Cornelia Shilunga, Ngoloneya gwaShana, Clemens Kashuupulwa oshowo prosecutor-general Martha Imalwa.

ILENI NANDJATO